माजी मुख्यमंत्री सिद्धरामय्या यांनी २०२८ ची विधानसभा निवडणूक न लढवण्याच्या निर्णयावर विधानपरिषद सभापती बसवराज होरट्टी यांनी नाराजी व्यक्त केली आहे. सिद्धरामय्यासारख्या अनुभवी नेत्यांनी राजकारणात कायम राहावे, यासाठी त्यांच्याशी चर्चा करणार असल्याचे होरट्टी यांनी सांगितले.

विजापूर येथे बोलताना बसवराज होरट्टी यांनी सध्याच्या राजकीय वातावरणावर नाराजी व्यक्त केली. सध्याची परिस्थिती पाहता आपल्यालाही अनेकदा निवृत्तीचा विचार येतो, असे त्यांनी सांगितले.

मात्र, सिद्धरामय्या हे प्रगल्भ आणि प्रदीर्घ अनुभव असलेले नेते आहेत. समाजाला त्यांच्या मार्गदर्शनाची आवश्यकता असल्याचे मत होरट्टी यांनी व्यक्त केले. राजकारणातील सध्याच्या परिस्थितीमुळे त्यांनी हा निर्णय घेतला असला तरी तो बदलण्याची गरज असल्याचे त्यांनी सांगितले. सिद्धरामय्या यांनी सर्वांना सोबत घेऊन जाणारे मुख्यमंत्री म्हणून काम केल्याचे आपण जवळून पाहिले आहे. अशा नेत्यांनी राजकारणात कायम राहणे राज्याच्या हिताचे असल्याचे बसवराज होरट्टी यांनी म्हटले.

सिद्धरामय्या यांच्याशी आपण उद्याच प्रत्यक्ष चर्चा करून निवृत्तीचा निर्णय आणि त्यासंदर्भातील वक्तव्य मागे घेण्याबाबत त्यांचे मन वळवण्याचा प्रयत्न करणार असल्याचे होरट्टी यांनी सांगितले.