कामगारांना किमान वेतन लागू करावे आणि शेतकऱ्यांच्या जमिनींचे संरक्षण व्हावे, या मागण्यांसाठी बेळगावात सीआयटीयूच्या नेतृत्वाखाली भव्य ‘जेल भरो’ आंदोलन करण्यात आले. शहरात भव्य रॅली काढून जिल्हाधिकारी कार्यालयासमोर निदर्शने करणाऱ्या आंदोलकांना पोलिसांनी ताब्यात घेतले.

बेळगाव शहरात सीआयटीयूच्या नेतृत्वाखाली आयोजित करण्यात आलेल्या ‘जेल भरो’ आंदोलनाने तीव्र रूप धारण केले. विविध क्षेत्रांतील शेकडो कामगारांनी रॅली काढून जिल्हाधिकारी कार्यालयासमोर धरणे आंदोलन केले.

आंदोलनाला संबोधित करताना सीआयटीयू नेत्या मंदा नेवगी यांनी, मुख्यमंत्री सिद्धरामय्या यांनी २२ मे रोजी दिलेले किमान वेतनाचे आश्वासन अद्याप पूर्ण झाले नसल्याचा आरोप केला. सरकार मंत्रिमंडळ चर्चेच्या नावाखाली वेळकाढूपणा करत असून अंगणवाडी सेविका आणि स्वच्छता कर्मचाऱ्यांवर तीव्र अन्याय होत आहे, असा संताप त्यांनी व्यक्त केला. तसेच शेतकऱ्यांच्या जमिनी हिसकावून कॉर्पोरेट कंपन्यांना दिल्या जात असल्याचा आरोप करत, शेतजमिनींचे तातडीने रक्षण करण्याची मागणी त्यांनी केली. सरकारने मागण्या मान्य न केल्यास राज्यभर तीव्र आंदोलन छेडण्याचा इशारा दिला. निदर्शने तीव्र होताच पोलिसांनी आंदोलकांना ताब्यात घेतले.