कोलकात्याच्या आरजीकर मेडिकल कॉलेज आणि रुग्णालयात घडलेल्या दुर्दैवी घटनेला दोन वर्षे पूर्ण झाल्याच्या पार्श्वभूमीवर, डॉक्टर व महिला आरोग्य कर्मचाऱ्यांवरील हिंसाचाराचा निषेध करण्यासाठी ८ ऑगस्ट रोजी ‘अभया दिन’ पाळला जात आहे.

‘नो टू वायलन्स अगेन्स्ट वूमन कमिटी’, ‘वायलन्स अगेन्स्ट डॉक्टर्स कमिटी’ आणि ‘पब्लिक अवेअरनेस कमिटी’च्या वतीने “डॉक्टरांवरील हिंसाचार आणि महिला आरोग्य कर्मचाऱ्यांची सुरक्षा” या विषयावर जनजागृती मोहीम हाती घेण्यात आली आहे.

या राष्ट्रव्यापी मोहिमेत डॉक्टर, आरोग्य कर्मचारी आणि नागरिकांनी सहभागी होऊन सुरक्षा, सन्मान आणि न्यायासाठी आवाज उठवावा, असे आवाहन आयोजकांनी केले आहे.

आरजीकर रुग्णालयातील घटनेचे स्मरण करण्यासोबतच डॉक्टर आणि महिला आरोग्य कर्मचाऱ्यांना कर्तव्य बजावताना सुरक्षित व सन्मानजनक वातावरण मिळणे अत्यंत गरजेचे असल्याचे या मोहिमेत नमूद करण्यात आले आहे. “आवाज उठवा, अन्यायाविरोधात उभे राहा” या संदेशाद्वारे महिला आरोग्य कर्मचाऱ्यांच्या सुरक्षेसाठी व प्रतिष्ठेसाठी नागरिकांनी पाठिंबा द्यावा, अशी विनंती करण्यात आली आहे.