कर्नाटकच्या राजकारणात दलित मुख्यमंत्रीपदाची चर्चा पुन्हा एकदा जोर धरू लागली आहे. मल्लिकार्जुन खर्गे मुख्यमंत्री होणार असतील तर हायकमांडचा निर्णय आम्हाला मान्य असेल, अशी भूमिका गृहमंत्री परमेश्वर यांनी मांडली आहे.

राज्यात पुन्हा एकदा दलित मुख्यमंत्रीपदाबाबत चर्चा सुरू झाली आहे. एआयसीसी अध्यक्ष मल्लिकार्जुन खर्गे यांनी मुख्यमंत्री व्हावे या शक्यतेवर बोलताना गृहमंत्री जी. परमेश्वर यांनी हायकमांडचा निर्णय अंतिम असल्याचे स्पष्ट केले. मल्लिकार्जुन खर्गे हे एआयसीसीचे अध्यक्ष असणे हे राज्याचे सौभाग्य असून, ते मुख्यमंत्री होणार असतील तर आम्ही सर्वजण त्याचे स्वागतच करू, असे जी. परमेश्वर यांनी म्हटले.

खर्गे यांनी इच्छा व्यक्त केली असती तर ते यापूर्वीच मुख्यमंत्री झाले असते का, या प्रश्नावर बोलताना परमेश्वर यांनी सावध प्रतिक्रिया दिली. मुख्यमंत्री निवडीबाबत आम्हाला अधिक माहिती नाही आणि त्यावर जास्त भाष्य करणे योग्य ठरणार नाही. हायकमांडला प्रत्येक गोष्टीची कल्पना असते. खर्गे यांना प्रत्येक राज्यातील राजकारणाचा मोठा अनुभव आहे. त्यामुळे त्यांनी मुख्यमंत्रीपदाची जबाबदारी स्वीकारल्यास आमचा त्याला पूर्ण पाठिंबा राहील, अशी प्रतिक्रिया जी. परमेश्वर यांनी दिली.

हुबळी येथील अहिंदा समावेशाबाबत बोलताना परमेश्वर यांनी शिक्षण आणि नोकरीत मागास राहिलेल्या घटकांसाठी अशा उपक्रमांची गरज असल्याचे सांगितले. दलित समुदाय देखील अहिंदाचाच भाग असून, योजनांच्या प्रभावी अंमलबजावणीसाठी हे मेळावे आवश्यक असल्याचे जी. परमेश्वर यांनी स्पष्ट केले.

राज्यातील अंतर्गत आरक्षणाची अधिसूचना जारी होताच रखडलेली नोकरभरती प्रक्रिया तातडीने सुरू केली जाईल, अशी माहिती त्यांनी दिली. दरम्यान, विनय कुलकर्णी यांच्या आमदारकीच्या अपात्रतेबाबतचा निर्णय विधानसभा सभापतींच्या अखत्यारीत आहे. सभापती नियमांनुसार योग्य ती कारवाई करतील आणि कोणीही कायद्याचे उल्लंघन करू शकणार नाही, असे जी. परमेश्वर यांनी नमूद केले.