राज्यातील मुख्यमंत्री बदल आणि दलित मुख्यमंत्री पदाच्या मागणीवर गृहमंत्री जी. परमेश्वर यांनी महत्त्वपूर्ण भाष्य केले आहे. पक्षात कोणतीही संभ्रमावस्था नसून हायकमांडच्या निर्णयाला सर्वजण बांधील आहेत, असे त्यांनी स्पष्ट केले.

कलबुर्गीमध्ये प्रसारमाध्यमांशी बोलताना राज्यातील मुख्यमंत्री बदलाच्या चर्चांवर जी. परमेश्वर यांनी भाष्य केले. हायकमांड लवकरच सर्व गोंधळ संपवेल असा विश्वास व्यक्त करतानाच, दलित मुख्यमंत्री पदाची मागणी हे लोकांचे प्रेम आहे आणि पक्षश्रेष्ठी या सर्व बाबींचा विचार करून योग्य निर्णय घेतील, असे जी. परमेश्वर यांनी म्हटले.

डी.के. शिवकुमार यांच्या वाढदिवसाच्या भेटीसह सत्तावाटपाच्या कोणत्याही निर्णयाबाबत हायकमांड जो निर्णय घेईल, तो प्रत्येक काँग्रेस कार्यकर्त्याला मान्य करावा लागेल, असे प्रतिपादन जी. परमेश्वर यांनी केले. सध्या आपण दिल्लीला जात नसल्याचे स्पष्ट करत त्यांनी ४ लाख कोटी रुपयांच्या बजेटमधील कार्यक्रमांची यशस्वी अंमलबजावणी होत असल्याचे सांगितले. मात्र, सिद्धरामय्या पाच वर्षे मुख्यमंत्री पदावर कायम राहतील का, या प्रश्नावर उत्तर देणे टाळून जी. परमेश्वर यांनी राजकीय चर्चांमधील उत्सुकता कायम ठेवली.