महाराष्ट्रातील पश्चिम घाट परिसरात गेल्या तीन दिवसांपासून होत असलेल्या मुसळधार पावसामुळे राज्यापूर बॅरेजमधून चिक्कोडी तालुक्यातील नद्यांमध्ये मोठ्या प्रमाणावर पाणी दाखल झाले आहे. त्यामुळे या भागातील पिण्याच्या आणि शेतीच्या पाण्याचा प्रश्न तूर्तास मिटला आहे.

चिक्कोडीचे तहसीलदार राजेश बुर्ली यांनी आपल्या कार्यालयात प्रसारमाध्यमांशी बोलताना सांगितले की, गेल्या दोन दिवसांपासून राजापूर बॅरेजमधून सुमारे ४ हजार क्युसेक पाणी चिक्कोडी तालुक्यातील नद्यांमध्ये प्रवाहित होत आहे. हे पाणी चिक्कोडी ओलांडून शेजारील कागवाड तालुक्याच्या मर्यादेपर्यंत पोहोचले आहे. नद्यांमध्ये पाणी आल्यामुळे या भागातील पाळीव प्राण्यांच्या आणि पिकांच्या पाण्याचा प्रश्न सुटणार आहे.

ऐन गरजेच्या वेळी महाराष्ट्रातून पाणी उपलब्ध झाल्याने शेतकरी आणि सर्वसामान्य नागरिकांची चिंता दूर झाली आहे. महाराष्ट्रातील कृष्णा नदीच्या पाणलोट क्षेत्रात पाऊस सुरूच असल्याने तालुका प्रशासन नदीच्या पाण्याच्या पातळीवर बारीक लक्ष ठेवून आहे, त्यामुळे नागरिकांनी घाबरून जाण्याचे कारण नाही, असे आश्वासन त्यांनी दिले.