राज्य सरकारच्या विद्युत क्षेत्राच्या खाजगीकरण धोरणाचा निषेध करण्यासाठी बागलकोट जिल्ह्यातील बनहट्टी येथे विविध शेतकरी आणि विणकर संघटनांनी एकत्र येत तीव्र निदर्शने केली. ‘हेस्कॉम’सह राज्यातील सर्व सरकारी वीज कंपन्या टाटा कंपनीच्या स्वाधीन करण्याचा निर्णय सरकारने तात्काळ रद्द करावा, अशी मागणी आंदोलकांनी केली.

बनहट्टी येथील तहसीलदार कार्यालयासमोर झालेल्या या आंदोलनात वीज कंपन्यांचे खाजगीकरण झाल्यास ‘गृहज्योती’, ‘भाग्यज्योती’, ‘अक्रम-सक्रम’ या योजनांसह लहान शेतकऱ्यांना मिळणारी १० एचपी (HP) पर्यंतची मोफत वीज पूर्णपणे बंद होईल, अशी भीती आंदोलकांनी व्यक्त केली. विणकर संघटनेचे राज्याध्यक्ष शिवलिंग आणि शेतकरी नेत्यांनी हजारो कोटी रुपयांच्या सरकारी सवलतींपासून जनतेला दूर ठेवण्यासाठीच हे शेतकरीविरोधी धोरण आणले जात असल्याचा आरोप केला. सरकारने हा निर्णय त्वरित मागे न घेतल्यास आगामी काळात संपूर्ण राज्यभर तीव्र आंदोलन छेडण्याचा इशारा शिवलिंग आणि इतर आंदोलकांनी दिला.

आधीच शिक्षण क्षेत्रापासून सर्वसामान्यांना वंचित ठेवले जात असताना, आता वीज क्षेत्रही खाजगी कंपन्यांच्या घशात घालून गरिबांच्या आणि शेतकऱ्यांच्या सवलती हिरावून घेण्याचा प्रयत्न सरकार करत असल्याचा आरोप यावेळी करण्यात आला.