कागवाड तालुक्यातील ऐनापूर येथे सिद्धेश्वर देवस्थानच्या यात्रेनिमित्त आयोजित कृषी परिसंवादात कृषी शास्त्रज्ञ डॉ. एस. आर. सलकीनकोप यांनी शेतकऱ्यांना मार्गदर्शन केले. सेंद्रिय शेती पद्धतीचा अवलंब करून ऊस आणि मक्याचे अधिक उत्पादन घेतल्यास शेती निश्चितपणे नफ्याची ठरेल, असे प्रतिपादन त्यांनी यावेळी केले.

डॉ. सलकीनकोप यांनी ऊस आणि मका लागवडीपूर्वी जमिनीची मशागत आणि खत व्यवस्थापन यावर सविस्तर माहिती दिली. केंद्र सरकार इथेनॉल उत्पादनावर भर देत असून, आता पेट्रोलमध्ये ३० टक्क्यांपर्यंत इथेनॉल वापरले जाणार आहे. मक्यापासून इथेनॉल निर्मिती वाढल्यामुळे भविष्यात मक्याला चांगला दर मिळेल, अशी शक्यता त्यांनी व्यक्त केली.

परिसंवादात कृषी शास्त्रज्ञ डॉ. सुनीलकुमार नुली यांनी ऊस पीक विज्ञान आणि सेंद्रिय शेती या विषयावर विशेष मार्गदर्शन केले. तसेच उगार साखर कारखान्याचे कृषी व्यवस्थापक जगदीश पटवर्धन यांनी ऊस पिकाच्या नियोजनाबाबत शेतकऱ्यांना माहिती दिली, असे त्यांनी म्हटले आहे.

या कृषी मेळाव्याच्या अध्यक्षस्थानी सिद्धेश्वर मंदिर समितीचे उपाध्यक्ष राजुगौडा पाटील होते. यावेळी अण्णासाहेब जाधव, उमेश कारची, भीमण्णा बिरडी यांच्यासह अनेक मान्यवर आणि शेतकरी मोठ्या संख्येने उपस्थित होते.