रायबाग तालुक्यातील अलखनूर येथील प्रसिद्ध करे सिद्धेश्वर मंदिराचा पट्टाचा हत्ती ध्रुव याचे नुकतेच आजारपणामुळे निधन झाले. त्याच्या स्मृतींना उजाळा देत रविवारी मंदिर परिसरात होम-हवन करून भावपूर्ण श्रद्धांजली अर्पण करण्यात आली.

ध्रुवाला बांधण्यात येत असलेल्या ठिकाणी विशेष पूजा आणि होम-हवन करण्यात आले. यावेळी माजी मंत्री दिवंगत वसंतराव पाटील यांच्या सून आणि माजी विधान परिषद सदस्य विवेकराव पाटील यांच्या पत्नी डॉ. वर्षा पाटील तसेच मंदिर समितीचे अध्यक्ष नागप्पा कंठीकार उपस्थित होते. त्यांनी ध्रुवाच्या छायाचित्राला पुष्पांजली अर्पण करून आदरांजली वाहिली.


यावेळी डॉ. वर्षा पाटील यांनी, गेल्या तीन दशकांपासून सर्वांचे प्रेम आणि जिव्हाळा मिळविलेल्या ध्रुवाचे जाणे अत्यंत दुःखद असल्याची भावना व्यक्त केली. त्याच्या आत्म्यास सद्गती मिळावी, यासाठी होम-हवनात सहभागी होऊन करे सिद्धेश्वर देवाकडे प्रार्थना केल्याचे त्यांनी सांगितले.
मंदिराचे अध्यक्ष नागप्पा कंठीकार यांनी सांगितले की, सुमारे ३० वर्षांपूर्वी माजी मंत्री दिवंगत वसंतराव पाटील यांनी मंदिराला ध्रुव हत्ती अर्पण केला होता. तेव्हापासून त्याच्या आहार, निवास आणि देखभालीची व्यवस्था आपुलकीने केली जात होती. अलीकडेच आजारी पडलेल्या ध्रुवावर म्हैसूरसह विविध ठिकाणच्या तज्ज्ञ पशुवैद्यकांकडून उपचार करण्यात आले. मात्र, उपचारांना यश न आल्याने शुक्रवारी त्याने अखेरचा श्वास घेतला. जिल्ह्यातील अनेक धार्मिक आणि सामाजिक कार्यक्रमांत सहभागी होऊन हजारो भक्तांचे प्रेम मिळविलेल्या ध्रुवाचे निधन ही भक्तांसाठी मोठी हानी असल्याची भावना त्यांनी व्यक्त केली.
कार्यक्रमात दिवंगत वसंतराव पाटील यांच्या कुटुंबीयांतर्फे पुजाऱ्यांना ‘आयरी’ देऊन सन्मानित करण्यात आले. अलखनूर आणि परिसरातील गावांमधील शेकडो भक्त तसेच गजप्रेमींनी उपस्थित राहून ध्रुवाला अंतिम श्रद्धांजली अर्पण केली.


Recent Comments