निपाणी येथे प्रधानमंत्री आवास योजनेअंतर्गत बांधण्यात आलेल्या ८०० घरांचे शुक्रवारी पारदर्शक लॉटरी पद्धतीने लाभार्थ्यांना वाटप करण्यात आले.

यावेळी आमदार शशिकला जोल्ले म्हणाल्या की, प्रत्येक सर्वसामान्य कुटुंबाचे स्वतःच्या हक्काच्या घराचे स्वप्न असते. प्रधानमंत्री आवास योजनेच्या माध्यमातून निपाणीतील गरीब आणि आर्थिकदृष्ट्या दुर्बल कुटुंबांचे हे स्वप्न साकार होत आहे. आश्रय समितीच्या अध्यक्षा म्हणून या प्रक्रियेत योगदान देता आल्याचा अभिमान आहे.

निपाणी शहराबाहेरील पट्टणकुडी गावाजवळ या योजनेंतर्गत एकूण १,८१२ घरे बांधण्यात येत आहेत. त्यापैकी ८०० घरे राहण्यायोग्य झाली असून, त्यांना मूलभूत सुविधाही उपलब्ध करून देण्यात आल्या आहेत. येत्या १५ दिवसांत वीजजोडणी आणि मीटर बसविण्याचे काम पूर्ण केले जाईल. तसेच या वसाहतीतील रहिवाशांना घरातूनच लघुउद्योग आणि स्वयंरोजगार सुरू करता यावा, यासाठीही प्रयत्न करण्यात येणार असल्याचे त्यांनी सांगितले.

कोणताही पक्षपात किंवा राजकीय हस्तक्षेप न होता सर्वांसमक्ष पारदर्शक लॉटरी पद्धतीने घरांचे वाटप करण्यात आले. यापुढेही घरांची आवश्यकता असलेल्या नागरिकांनी आवश्यक कागदपत्रांसह नगरपालिका किंवा आमदारांच्या कार्यालयाशी संपर्क साधावा, असे आवाहन त्यांनी केले.

तहसीलदार सुरेश मुंजे म्हणाले की, संपूर्ण कर्नाटकात निपाणी येथे एवढ्या मोठ्या प्रमाणात गृहनिर्माण योजना राबविली जात असल्याचा अभिमान आहे. लाभार्थ्यांची निवड पूर्णपणे पारदर्शक पद्धतीने करण्यात येत असून, कोणावरही अन्याय होणार नाही, याची प्रशासनाकडून दक्षता घेण्यात आली आहे.

एका लहान मुलीच्या हस्ते पहिली चिठ्ठी काढून लॉटरी प्रक्रियेला सुरुवात करण्यात आली. त्यानंतर वेगवेगळ्या महिलांच्या हस्ते चिठ्ठ्या काढून ८०० लाभार्थ्यांची निवड करण्यात आली. नाव जाहीर होताच अनेक लाभार्थ्यांनी आनंद व्यक्त केला.

घरवाटप प्रक्रियेदरम्यान पारदर्शकता आणि सुरक्षितता राखण्यासाठी विशेष व्यवस्था करण्यात आली होती. यापूर्वी घरवाटपावरून झालेल्या राजकीय वादांच्या पार्श्वभूमीवर कार्यक्रमस्थळी कडक पोलीस बंदोबस्त ठेवण्यात आला होता. सभागृहात केवळ संबंधित लाभार्थी आणि आश्रय समितीच्या पदाधिकाऱ्यांनाच प्रवेश देण्यात आला.

यावेळी नगरपालिका आयुक्त गणपती पाटील आणि सीपीआय बी. एस. तळवार उपस्थित होते.