धारवाड येथे १ नोव्हेंबर रोजी कर्नाटक राज्योत्सव अत्यंत थाटामाटात आणि अर्थपूर्ण पद्धतीने साजरा करण्यासाठी सर्व विभागांच्या अधिकाऱ्यांनी आवश्यक ती तयारी करावी, असे निर्देश जिल्हाधिकारी स्नेहल आर. यांनी दिले आहेत.

जिल्हाधिकारी कार्यालयाच्या नवीन सभागृहात आयोजित कर्नाटक राज्योत्सव पूर्वतयारी बैठकीच्या अध्यक्षतेवरून त्या बोलत होत्या. कर्नाटकाच्या एकत्रीकरण चळवळीचा आणि संघर्षाचा इतिहास विद्यार्थी व नागरिकांपर्यंत पोहोचवण्यासाठी सांस्कृतिक कार्यक्रमांचे आयोजन करावे, असे त्यांनी सांगितले. दरवर्षीप्रमाणे यंदाही आर. एन. शेट्टी क्रीडांगणावर मुख्य सोहळा पार पडणार असून सर्व अधिकारी आणि कर्मचाऱ्यांनी सोहळ्याला उपस्थित राहणे बंधनकारक आहे.

पोलीस दल, गृहरक्षक दल, एनसीसी, भारत सेवा दल आणि स्काउट्स अँड गाईड्सच्या विद्यार्थ्यांनी संचलनामध्ये सहभाग घ्यावा. सार्वजनिक बांधकाम विभागाने भव्य व्यासपीठ उभारावे, तर महानगरपालिकेने स्वच्छता व शौचालयांची सोय करावी. राज्योत्सवाच्या पूर्वसंध्येला प्रमुख सरकारी इमारतींवर आकर्षक रोषणाई करावी, असे आदेश त्यांनी दिले. तसेच बैठकीस विनापरवानगी अनुपस्थित राहिलेल्या आणि प्रतिनिधी पाठवलेल्या अधिकाऱ्यांना कारणे दाखवा नोटीस बजावण्याचे निर्देश त्यांनी दिले.

या बैठकीला जिल्हा पोलीस प्रमुख गुंजन आर्य, डीसीपी श्रुती एन. एस., साहाय्यक पोलीस आयुक्त प्रशांत सिद्धनगौडा, उपविभागीय अधिकारी प्रभावती फकीरपूर, जिल्हा आरोग्य अधिकारी डॉ. परशुराम एफ. के. यांच्यासह विविध विभागांचे जिल्हास्तरीय अधिकारी उपस्थित होते.