केवळ पाचशे रुपयांच्या कर्जाच्या वादातून सुरू झालेल्या भांडणाचा शेवट हत्येत झाल्याची घटना हुबळी येथे उघडकीस आली आहे. गंभीर जखमी झालेल्या व्यक्तीचा रुग्णालयात उपचारादरम्यान मृत्यू झाल्याने या प्रकरणाला आता हत्येचे स्वरूप आले आहे.

मृत व्यक्तीची ओळख ईरण्णा हुरकडळी (४५) अशी झाली आहे. ते हुबळी शहरातील यल्लापूर ओणी येथील रहिवासी असून ऑटो चालवून आपला उदरनिर्वाह करत होते.

मिळालेल्या माहितीनुसार, मृत ईरण्णा यांनी आरोपी शशीधरकडून पाचशे रुपये कर्ज घेतले होते. याच पैशांच्या देवाणघेवाणीवरून दोघांमध्ये वाद झाला आणि तो चांगलाच विकोपाला गेला. २५ जून रोजी झालेल्या या वादात शशीधरने ईरण्णा यांच्यावर दगडाने हल्ला केला. या हल्ल्यात गंभीर जखमी झालेल्या ईरण्णा यांना तातडीने हुबळीच्या किम्स रुग्णालयात दाखल करण्यात आले होते. मात्र, काल रात्री उपचारादरम्यान त्यांचा मृत्यू झाला.

या घटनेप्रकरणी बेंडिगेरी पोलीस ठाण्यात गुन्हा दाखल करण्यात आला असून पोलिसांनी आरोपी शशीधरला अटक करून न्यायालयीन कोठडीत पाठवले आहे.