पतीच्या दीर्घायुष्यासाठी विवाहित महिलांकडून पाळले जाणारे पवित्र वटसावित्री व्रत बेळगाव जिल्ह्यातील चिक्कोडी शहरात अत्यंत उत्साहात आणि भक्तीभावाने साजरे करण्यात आले.

चिक्कोडी शहरात सुवासिनींनी सकाळीच पारंपरिक पद्धतीने उपवास करून वडाच्या झाडाची पूजा केली. शहरातील विविध भागांत वडाच्या झाडाजवळ महिलांची मोठी गर्दी पाहायला मिळाली. यावेळी वटसावित्री व्रत करणाऱ्या स्नेहा चौगला म्हणाल्या, पतीच्या सुखी आयुष्यासाठी आपण आज वटवृक्षाची पूजा करून प्रार्थना केली.

पूजेदरम्यान महिलांनी वडाच्या झाडाला पांढरा धागा गुंडाळून प्रदक्षिणा घातली. तसेच आंबे, केळी आणि हळद-कुंकू लावून विशेष पूजा केली. सुवासिनींनी एकमेकींची ओटी भरून सणाचा आनंद साजरा केला. यमराजाकडून पतीचे प्राण परत आणणाऱ्या सावित्रीच्या पौराणिक कथेच्या स्मरणार्थ ही पूजा केली जाते, असे शशिकला यांनी सांगितले.

पतीच्या दीर्घायुष्यासाठी आम्ही हे व्रत करत असून, सकाळी उपवास करून वडाच्या झाडाची मनोभावे पूजा केल्याचे पूजा जाधव यांनी नमूद केले.

आधुनिक युगातही सनातनी संस्कृती आणि संसाराची पवित्रता जपणारा वटसावित्री सण चिक्कोडीत मोठ्या भक्तीभावाने पार पडला.