बेळगाव जिल्ह्यातील कित्तूर तालुक्यातील एम. के. हुबळी गावात पारंपरिक मोहरम सण अत्यंत सलोख्याने आणि शांततापूर्ण वातावरणात साजरा करण्यात आला. जात आणि धर्माच्या भिंती ओलांडून हिंदू-मुस्लिम बांधव एकत्र आल्याने या गावाने पुन्हा एकदा सामाजिक सौहार्दाचे उत्तम उदाहरण समोर ठेवले आहे.

या ऐतिहासिक आणि पारंपरिक सणाच्या निमित्ताने गावात पाच डोली आणि सात पीर देवांची भव्य मिरवणूक काढण्यात आली. या मिरवणुकीत सर्वधर्मीय भाविक मोठ्या संख्येने सहभागी झाले होते, ज्यामुळे सोहळ्याला विशेष रंगत आली.

सणादरम्यान हजरत इमाम हसन आणि इमाम हुसेन यांच्या ऐतिहासिक त्यागाचे व बलिदानाचे अत्यंत श्रद्धापूर्वक स्मरण करण्यात आले. भाविकांनी पीर देवांचे दर्शन घेऊन आपल्या धार्मिक परंपरा पूर्ण केल्या.

गावात मिरवणुकीदरम्यान कोणताही अनुचित प्रकार घडू नये यासाठी कित्तूर पोलीस ठाण्याचे उपनिरीक्षक (PSI) आणि पोलीस कर्मचाऱ्यांनी चोख बंदोबस्त तैनात केला होता. प्रशासनाच्या सहकार्याने आणि नागरिकांच्या सामंजस्याने हा सण अत्यंत शांततेत आणि उत्साहात पार पडला.