उगार शुगर कारखान्याचे मालक, ज्येष्ठ साखर व्यावसायिक आणि प्रसिद्ध समाजसेवक राजाभाऊ शिरगावकर यांच्या निधनानंतर त्यांच्या पार्थिवाची उगार शुगर कारखान्याच्या मुख्य प्रवेशद्वारातून अंतिम यात्रा काढण्यात आली.

९१ वर्षांच्या राजाभाऊ शिरगावकर यांचे गुरुवारी सकाळी निधन झाले होते. त्यांचे पार्थिव उगार येथील त्यांच्या निवासस्थानी अंतिम दर्शनासाठी ठेवण्यात आले होते. या वेळी त्यांचे कुटुंबीय, विविध मठांचे स्वामीजी, राजकीय नेते, मान्यवर, कारखान्याचे अधिकारी, कामगार आणि ऊस उत्पादक शेतकऱ्यांनी मोठ्या संख्येने उपस्थित राहून दर्शन घेतले.

देशाच्या स्वातंत्र्यापूर्वी स्थापन झालेला उगार शुगर कारखाना गेल्या अनेक दशकांपासून या भागातील शेतकरी आणि कामगारांच्या उपजीविकेचा मुख्य आधार राहिला आहे. उत्तर कर्नाटक आणि दक्षिण महाराष्ट्रातील ऊस उत्पादक शेतकऱ्यांच्या आर्थिक प्रगतीत या कारखान्याचे मोठे योगदान आहे. राजाभाऊ शिरगावकर यांच्या दूरदृष्टीच्या नेतृत्वामुळेच या कारखान्याने प्रगतीची नवी शिखरे गाठली होती.

विजापूरच्या ज्ञानयोगाश्रमाचे अध्यक्ष बसवलिंग स्वामीजी, शिवानंद महाविद्यालयाचे डॉ. प.पू. श्री श्रद्धानंद स्वामीजी यांच्यासह विविध मठांच्या स्वामीजींनी त्यांना श्रद्धांजली वाहिली. राजाभाऊ शिरगावकर यांनी या भागातील अनेक मठ, मंदिरे, शैक्षणिक संस्था आणि सामाजिक कार्याला नेहमीच सढळ हाताने मदत केली असून त्यांच्या निधनाने समाजाची कधीही न भरून निघणारी हानी झाल्याचे त्यांनी म्हटले.

माजी मंत्री श्रीमंत पाटील, माजी आमदार मोहनराव शहा, शहाजहान डोंगरेगाव, कन्नड युवक संघाचे अध्यक्ष सिद्धगौडा कागे यांच्यासह विविध क्षेत्रांतील मान्यवरांनी अंतिम दर्शन घेऊन आदरांजली वाहिली. तसेच उगार लायन्स क्लबचे अध्यक्ष डॉ. मोहन कटगेरी आणि सदस्यांनी आपल्या संस्थापकाला अखेरचा प्रणिपात केला.

या वेळी राजाभाऊ शिरगावकर यांचे नातेवाईक प्रफुल्ल शिरगावकर, सुशीर शिरगावकर, सुपुत्र सचिन शिरगावकर, महिला मंडळाच्या माजी अध्यक्षा स्मिताताई शिरगावकर, राधिकाताई शिरगावकर, उगार शुगर कारखान्याचे व्यवस्थापकीय संचालक चंदन शिरगावकर, रोहन शिरगावकर आणि अविनाश शिरगावकर यांच्यासह सर्व कुटुंबीय अंतिम विधीमध्ये सहभागी झाले होते.

अंतिम यात्रेदरम्यान कारखान्यातील अनेक कामगारांना आपल्या लाडक्या मालकाच्या आठवणींनी अश्रू अनावर झाले होते. त्यानंतर राजाभाऊ शिरगावकर यांचे सुपुत्र सचिन शिरगावकर आणि कुटुंबीयांच्या उपस्थितीत पार्थिव कारखान्याच्या मुख्य प्रवेशद्वारातून उगार येथील स्मशानभूमीकडे नेण्यात आले. हजारो नागरिकांच्या उपस्थितीत सुपुत्र सचिन शिरगावकर यांनी अंतिम विधी पार पाडत चितेला भडाग्नी दिला. या वेळी कारखान्यातील कामगार, शेतकरी आणि हजारो चाहत्यांनी त्यांना अत्यंत भावपूर्ण श्रद्धांजली वाहिली.