विजापूर येथे बोलताना मंत्री मधु बंगारप्पा यांनी फोन टॅपिंग आणि तपास यंत्रणांच्या गैरवापरावरून पंतप्रधान नरेंद्र मोदी यांच्या नेतृत्वाखालील केंद्रातील भाजप सरकारवर जोरदार टीका केली.

ईडी, आयटीसह विविध तपास यंत्रणांचा वापर करून फोन टॅपिंग केले जात असून, देशभरात गोंधळाचे वातावरण निर्माण केले जात असल्याचा आरोप त्यांनी केला. ज्यांच्यावर खालच्या पातळीवर टीका केली जाते, त्यांनाच आठवडाभरात ‘वॉशिंग मशीन’मध्ये टाकून स्वच्छ केल्याप्रमाणे जवळ केले जाते आणि त्यांच्याच हाती सत्ता सोपवली जाते. अशा राजकारणाची लाज वाटत नाही का, असा सवाल त्यांनी उपस्थित केला.

फोन टॅपिंगमागे सत्ताधाऱ्यांची भीती आणि असुरक्षितता असल्याचे ते म्हणाले. सत्तेच्या दडपशाहीविरोधात देशभरातील जनतेमध्ये संताप आहे. लहान मुलांसह नागरिक रस्त्यावर उतरून आंदोलन करण्यास पुढे येत असल्याने सरकारला भीती वाटत आहे. लोक काय बोलतात आणि काय करतात, याची माहिती मिळवण्यासाठी फोन टॅपिंग केले जात असल्याचा आरोपही त्यांनी केला.

केंद्रातील भाजप सरकार सत्तेचा गैरवापर करत असल्याचा आरोप करत मधु बंगाराप्पा यांनी सरकारवर टीका केली.