राज्यात मान्सूनच्या अपयशामुळे अडचणीत सापडलेल्या शेतकऱ्यांची स्थिती जाणून घेण्यासाठी मुख्यमंत्री डी. के. शिवकुमार यांनी उत्तर कर्नाटकातील प्रमुख जिल्ह्यांमध्ये दुष्काळी भागाची हवाई पाहणी केली.

मुख्यमंत्र्यांनी बागलकोट, विजयनगर आणि बळ्ळारी जिल्ह्यांतील दुष्काळग्रस्त भागाची पाहणी केली. बागलकोट जिल्ह्यातील हुनगुंद येथे त्यांनी थेट शेतकऱ्यांच्या शेताला भेट देऊन कांदा, मिरची आणि सूर्यफूल पिकांच्या नुकसानीची पाहणी केली. या पाहणीदरम्यान विधानसभेचे उपाध्यक्ष मंकाळू वैद्य आणि राज्यसभा सदस्य डॉ. जी. सी. चंद्रशेखर उपस्थित होते.

पाहणीनंतर बोलताना मुख्यमंत्री डी. के. शिवकुमार म्हणाले की, राज्यात यंदा भीषण दुष्काळाची परिस्थिती असून ४२ ते ४३ टक्के पावसाची तूट झाली आहे. त्यामुळे गदग, धारवाड, हावेरी आणि बागलकोटसह अनेक जिल्ह्यांत पीक आलेले नाही.

शेतकऱ्यांचे प्रश्न आणि कस्तुरीरंगन अहवालावर सविस्तर चर्चा करण्यासाठी राज्य सरकारने विशेष अधिवेशन बोलावले आहे. विरोधी पक्ष राजकारण करत असल्याचा आरोप करत, ६० दिवसांच्या कालावधीचा योग्य वापर करून शेतकऱ्यांना सर्वसमावेशक मदत देण्यास सरकार कटिबद्ध असल्याचे मुख्यमंत्र्यांनी स्पष्ट केले.