शहराच्या वेशीवरून दुधगंगा नदी वाहत असूनही सदलगावासीयांना पिण्याच्या शुद्ध पाण्यासाठी भटकंती करावी लागत आहे. सुमारे ४० हजार लोकसंख्येच्या या शहरात प्रशासनाच्या दुर्लक्षामुळे लाखो रुपये खर्चून उभारलेले शुद्ध पाण्याचे प्रकल्प आज पूर्णपणे बंद अवस्थेत आहेत.

सदलगा शहराच्या उत्तर भागातून दुधगंगा नदी पूर्ण क्षमतेने वाहत आहे. मात्र, योग्य नियोजनाअभावी येथील नागरिकांना गेल्या दशकभरापासून शुद्ध पाण्यासाठी संघर्ष करावा लागत आहे. नागरिकांची ही समस्या सोडवण्यासाठी २०१४ मध्ये नगरपरिषद हद्दीत सुमारे १४ शुद्ध पिण्याच्या पाण्याच्या संयंत्रांची उभारणी करण्यात आली होती. मात्र, देखभालीअभावी यातील बहुतांश प्रकल्प सद्यस्थितीत बंद पडले आहेत.

सध्या या १४ प्रकल्पांपैकी केवळ कुंदकुंद शाळा आणि बनशंकरी देवी मंदिराजवळील दोनच प्रकल्प कसेबसे सुरू आहेत. उर्वरित १२ प्रकल्प गंजून खराब झाले आहेत. नगरपरिषदेच्या दुर्लक्षामुळे या प्रकल्पांच्या इमारतींची दुरवस्था झाली असून, आतील महागड्या साहित्याची चोरी झाली आहे. नागरिकांच्या करातून उभारलेला सुमारे अर्धा कोटी रुपयांचा हा प्रकल्प आता पूर्णपणे निरुपयोगी ठरला आहे.
“लाखो रुपये खर्च करून उभारलेले पाण्याचे प्रकल्प बंद आहेत. प्रशासनाने हे प्रकल्प त्वरित सुरू करून नागरिकांना शुद्ध पाणी द्यावे.”

अशी मागणी स्थानिक ‘करवे’ अध्यक्ष वैभव पाटील यांनी केली.

सार्वजनिक निधीचा असा अपव्यय थांबवून लोकप्रतिनिधी आणि वरिष्ठ अधिकाऱ्यांनी या समस्येकडे गांभीर्याने लक्ष देणे गरजेचे आहे. अन्यथा स्थानिक नागरिक आणि संघटनांकडून आंदोलन छेडले जाण्याची शक्यता निर्माण झाली आहे.

डी. के. उप्पार, इन न्यूज, चिक्कोडी