धारवाड जवळील अंबलीकोप्प येथे समाजकंटकांनी एका देवतेच्या मूर्तीची विटंबना केल्याची घटना समोर आली आहे. या घटनेनंतर परिसरात तणाव निर्माण झाला असून, आरोपींच्या अटकेसाठी भाजप नेते मंजुनाथ मक्कळगेरी यांच्या नेतृत्वाखाली आंदोलन करण्यात आले.

धारवाड जिल्ह्यातील अंबलीकोप्प गावातील रायण्णा सर्कल येथील खुल्या जागेत असलेल्या श्री बीरलींगेश्वर मूर्तीची विटंबना करण्यात आली. ही घटना उघडकीस येताच गावात तणावाचे वातावरण निर्माण झाले. या पार्श्वभूमीवर स्थानिक नेते आणि भाजप नेते मंजुनाथ मक्कळगेरी यांनी घटनास्थळाला भेट देऊन तीव्र निषेध नोंदवला आणि दोषींना तात्काळ अटक करण्याची मागणी केली.

हा प्रकार धारवाड ग्रामीण पोलीस ठाण्याच्या हद्दीत घडला आहे. घटनेचे गांभीर्य लक्षात घेऊन कायदा व सुव्यवस्था राखण्यासाठी ग्रामपंचायत अधिकारी आणि धारवाड जिल्हा पोलीस प्रमुखांनी घटनास्थळी भेट देऊन पाहणी केली आहे. पोलीस या प्रकरणाचा पुढील तपास करत आहेत.