महाराष्ट्रातील घाटमाथ्यावर पावसाचा जोर काहीसा ओसरला असला, तरी कृष्णा आणि तिच्या उपनद्यांमधील पाण्याचा प्रवाह कायम आहे. सध्या महाराष्ट्रातून कर्नाटकात १ लाख ३० हजार क्युसेक पाण्याची आवक सुरू असल्याने नद्या अद्याप धोक्याच्या पातळीवरून वाहत आहेत.

महाराष्ट्रातील प्रमुख पाणलोट क्षेत्र असलेल्या कोयना येथे २ मिमी, नवजा येथे १ मिमी आणि महाबळेश्वर भागात ९ मिमी असा मध्यम पाऊस झाला आहे. यामुळे कृष्णा नदीच्या पाणीपातळीत किंचित घट झाली असली, तरी पूरस्थिती कायम आहे. सध्या कृष्णा, दूधगंगा आणि वेदगंगा नद्या पूर्ण क्षमतेने वाहत आहेत.

नद्यांना आलेल्या पुरामुळे चिकोडी विभागातील एकूण १० प्रमुख पूल पाण्याखाली गेले आहेत. परिणामी, या भागातील अनेक गावांचा थेट संपर्क तुटला असून नागरिकांना आणि वाहनधारकांना ये-जा करण्यासाठी पर्यायी मार्गांचा वापर करावा लागत आहे.

परिस्थितीचे गांभीर्य ओळखून जिल्हा प्रशासनाने नदीकाठच्या गावांमध्ये हाय अलर्ट जारी केला आहे. नागरिकांनी, तरुणांनी किंवा गुराढोरांनी नदीपात्रात उतरू नये, तसेच सेल्फी घेणे किंवा पाण्यात धाडस करणे टाळावे, असे आवाहन करण्यात आले आहे. पूरस्थिती ओसरेपर्यंत प्रत्येकाने प्रशासनाच्या सूचनांचे काटेकोर पालन करावे, असे निर्देश देण्यात आले आहेत.