बेळगाव जिल्ह्यातील अथणी शहरात सायकल चोरीच्या घटनांमध्ये मोठी वाढ झाली असून, एका रुग्णालयाबाहेरून सायकल चोरीला गेल्याची ताजी घटना उघडकीस आली आहे. ही संपूर्ण चोरी सीसीटीव्ही कॅमेऱ्यात कैद झाली आहे.

शहरातील गुंजीगावी रुग्णालयाच्या समोरील आवारात पार्क केलेली सायकल अज्ञात चोरांनी चोरून नेली. ही सायकल प्रशांत चव्हाण यांच्या मालकीची असल्याचे निष्पन्न झाले आहे. चोरांनी अत्यंत चालाकीने सायकल पळवून नेल्याचे सीसीटीव्ही फुटेजमध्ये स्पष्ट दिसत आहे.

अथणी शहरात गेल्या काही दिवसांपासून सायकल चोरीचे प्रमाण वाढल्याने स्थानिक नागरिक आणि पालकांमध्ये चिंतेचे वातावरण आहे. दिवसाढवळ्या होणाऱ्या या चोऱ्यांमुळे पोलिसांच्या गस्तीवरही प्रश्नचिन्ह उपस्थित केले जात आहे.

स्थानिक पोलिसांनी या घटनेची नोंद घेतली असून, सीसीटीव्ही फुटेजच्या आधारे संशयित आरोपींची ओळख पटवण्याचे काम सुरू केले आहे. चोरांना पकडण्यासाठी पोलिसांनी तपासाची चक्रे गतीने फिरवली आहेत.