बागलकोटमधील लोकापूरजवळ आज एक भीषण रस्ता अपघात झाला. मुधोळ तालुक्यातील जालीबेरी गावातील तीन जण दुचाकीवरून जात असताना एका भरधाव ट्रकने त्यांच्या दुचाकीला जोराची धडक दिली. या अपघातात दुचाकीवरील दोन महिला गंभीररित्या जखमी झाल्या आहेत.

जालीबेरी गावातील रहिवासी असलेल्या काशव्वा होसहळ्ळी आणि दानव्वा होसहळ्ळी अशी गंभीर जखमी झालेल्या महिलांची नावे आहेत. त्यांच्यासोबत दुचाकी चालवणारे गिरियप्पा हे किरकोळ जखमी झाले असून ते सुदैवाने बचावले आहेत. अपघातानंतर गंभीर जखमी झालेल्या दोन्ही महिलांना तातडीने बागलकोटमधील एका खाजगी रुग्णालयात दाखल करण्यात आले असून त्यांच्यावर अतिदक्षता विभागात उपचार सुरू आहेत.

या घटनेची माहिती मिळताच बागलकोटचे पोलीस अधीक्षक सिद्धार्थ गोयल यांनी अपघातस्थळाला भेट देऊन पाहणी केली. अपघातास कारणीभूत ठरलेल्या ट्रक चालकाविरुद्ध लोकापूर पोलीस ठाण्यात गुन्हा दाखल करण्यात आला असून पोलीस पुढील कायदेशीर कारवाई करत आहेत.