धारवाडमध्ये स्वतंत्र महानगरपालिका स्थापन करण्याच्या मागणीसाठी सुरू असलेले आंदोलन आज १३ व्या दिवसात पाऊल ठेवत आहे. धारवाडमध्ये उच्च न्यायालयाचे खंडपीठ स्थापन करण्यासाठी ऐतिहासिक लढा देणारे ज्येष्ठ वकील बी. डी. हिरेमठ यांनी आता या मागणीसाठी अहोरात्र धरणे आंदोलन सुरू केले आहे. या आंदोलनाला स्थानिक भाजप आणि काँग्रेसच्या पदाधिकाऱ्यांनी जाहीर पाठिंबा दिला आहे.

हुबळी-धारवाड महानगरपालिकेच्या धारवाडमधील कार्यालयासमोर गेल्या १२ दिवसांपासून स्वतंत्र पालिकेसाठी सातत्याने आंदोलन सुरू असून आज या आंदोलनाचा १३ वा दिवस आहे. या आंदोलनात हुबळी-धारवाड महानगरपालिका नको, तर धारवाडसाठी स्वतंत्र महानगरपालिका हवी, अशा घोषणा देत आंदोलकांनी प्रशासनाविरोधात तीव्र संताप व्यक्त केला. जोपर्यंत राज्य सरकार आणि राज्यपाल धारवाड शहरासाठी स्वतंत्र महानगरपालिका मंजूर करत नाहीत, तोपर्यंत हे आंदोलन असेच सुरू राहील, असा इशारा यावेळी देण्यात आला.