बागलकोट जिल्ह्यातील इळकल शहरासह परिसरात गेल्या तीन-चार दिवसांपासून डिझेलचा तीव्र तुटवडा निर्माण झाला आहे. कष्टाचा हंगाम असतानाच इंधनाचा पुरवठा विस्कळीत झाल्यामुळे शेतकरी आणि वाहनधारक मोठ्या अडचणीत सापडले आहेत.

बागलकोट जिल्ह्यातील इळकल शहरामध्ये डिझेलचा तुटवडा गंभीर बनला आहे. शहरातील बहुतांश पेट्रोल बंकांवर डिझेल उपलब्ध नसल्याने मालकांनी ‘नो स्टॉक’चे फलक लावले आहेत. सध्या शेतीकामांचे दिवस असल्याने ट्रॅक्टर आणि इतर यंत्रसामग्रीसाठी डिझेल आवश्यक आहे; मात्र इंधन मिळत नसल्याने शेतकरी हवालदिल झाले आहेत. डिझेल संपल्याची माहिती मिळताच शेकडो शेतकऱ्यांनी हातात कॅन घेऊन पेट्रोल बंकांवर गर्दी केली असून, इंधनासाठी त्यांची मोठी धावपळ उडाली आहे.

दुसरीकडे डिझेल अभावी ट्रक, बस आणि व्यावसायिक वाहनांच्या वाहतुकीवरही मोठा परिणाम झाला असून, वाहतूक क्षेत्र ठप्प होण्याची भीती निर्माण झाली आहे. आधीच वाढलेल्या इंधन दरांमुळे नागरिक त्रस्त असताना, या अचानक उद्भवलेल्या समस्येने चिंता आणखी वाढवली आहे. तेल कंपन्या आगामी काळात पेट्रोल आणि डिझेलचे दर आणखी वाढवण्यासाठी तर असा कृत्रिम तुटवडा निर्माण करत नाहीत ना, अशी शंका नागरिकांमधून उपस्थित केली जात आहे. जिल्हा प्रशासनाने या प्रकरणात तातडीने लक्ष घालून इंधन पुरवठा सुरळीत करावा, अन्यथा आंदोलन छेडण्यात येईल असा इशारा स्थानिक नागरिकांनी दिला आहे.