बैलहोंगल तालुक्यातील गद्दी करविनकोप्प येथील बि. एस. येडियुरप्पा कल्याण मंडपात आज शेकडो जोडप्यांनी विवाहबंधनात प्रवेश केला. समाजसेवक गुरुदेव पाटील यांनी आयोजित केलेला हा विनामूल्य सामूहिक विवाह सोहळा साधेपणा आणि परंपरेचा आदर्श ठरला.

गद्दी करविनकोप्प क्रॉस जवळील येडियुरप्पा कल्याण मंडपात आयोजित या सोहळ्यात कारंजी मठाचे गुरुसिद्ध महास्वामीजींनी उपस्थित राहून वधू-वरांना शुभाशीर्वाद दिले.

दाम्पत्य जीवन हे विश्वास, आदर, समन्वय आणि त्यागाच्या पायावर उभे असते. वैवाहिक जीवन म्हणजे केवळ दोन व्यक्तींचे बंधन नसून दोन मनांचे मीलन आहे. पती-पत्नीने एकमेकांशी प्रेमाने आणि निष्ठेने वागल्यास ते ईश्वरालाही प्रिय असते, असे मत गुरुसिद्ध महास्वामीजी यांनी व्यक्त केले.

कार्यक्रमाला प्रमुख पाहुण्या म्हणून उपस्थित राहिलेल्या अरुणादेवी म्हणाल्या की, साधेपणासाठी ओळखल्या जाणाऱ्या येडियुरप्पा यांच्या नावाच्या या कल्याण मंडपात अत्यंत साध्या पद्धतीने विवाह सोहळा पार पडणे ही आनंदाची बाब आहे. आजच्या काळात लग्नांमध्ये होणारा वायफळ खर्च टाळून, संतांच्या उपस्थितीत असा सोहळा होणे अनुकरणीय आहे. या उपक्रमासाठी गुरुदेव पाटील यांनी केलेले प्रयत्न कौतुकास्पद आहेत, अशी प्रतिक्रिया अरुणादेवी यांनी दिली.

यावेळी हुक्केरी हिरेमठाचे चंद्रशेखर शिवाचार्य महास्वामीजी, अंकलगी अडवी सिद्धेश्वर मठाचे अमरसिद्धेश्वर महास्वामीजी आणि अरळीकट्टी विरक्तमठाचे शिवमूर्ती महास्वामीजी उपस्थित होते.

कार्यक्रमाच्या अध्यक्षस्थानी माजी आमदार महंतेश दोडगौडर होते. व्यासपीठावर माजी आमदार अनिल बेनके, माजी खासदार मंगला अंगडी, गुरुदेव निंगणगौडा पाटील, सुभाष पाटील, शिवाजी सुंटकर, लक्ष्मी वक्रम इनामदार, विरूपाक्ष यमकनमर्डी, परमेश्वर हेगडे, माजी महापौर एन. बी. निर्वाणी, डॉ. रवी पाटील, किरण जाधव, रत्नप्रभा बेल्लद, सुरेश यादव, राहुल गुरुदेव पाटील यांच्यासह अनेक मान्यवर उपस्थित होते.