खानापूरमधील शासकीय प्रथम श्रेणी पदवी महाविद्यालयात महाविद्यालय विकास समितीची (सीडीसी) बैठक आणि रोजगार मेळावा उत्साहात पार पडला. आमदार आणि समितीचे अध्यक्ष विठ्ठल हलगेकर यांनी या उपक्रमासाठी विशेष पुढाकार घेतला होता.

या रोजगार मेळाव्याला विद्यार्थ्यांनी मोठा प्रतिसाद दिला. बेंगळुरू, पुणे आणि हुबळी येथील सुमारे २० नामांकित कंपन्यांनी या मेळाव्यात सहभाग नोंदवला. या कंपन्यांनी विद्यार्थ्यांना त्यांच्याकडील नोकरीच्या संधींबाबत सविस्तर माहिती दिली.

रोजगार मेळाव्यानंतर आमदार विठ्ठल हलगेकर यांच्या अध्यक्षतेखाली सीडीसी समितीची महत्त्वाची सभा झाली. महाविद्यालयाचा विकास आणि विद्यार्थ्यांना आवश्यक असलेल्या मूलभूत सोयी-सुविधा उपलब्ध करून देण्याबाबत सभेत सविस्तर चर्चा करण्यात आली. यावेळी महाविद्यालयाचे प्राचार्य, कर्मचारी आणि समितीचे सदस्य उपस्थित होते.