धारवाड जिल्ह्यातील अण्णिगेरी पोलीस ठाण्याच्या व्याप्तीतील बसापूर गावात झालेल्या घरफोडीचा पोलिसांनी यशस्वी तपास केला आहे. पोलिसांनी अवघ्या आठ दिवसांत दोन आरोपींना अटक केली असून त्यांच्याकडून पाच लाख रुपये किमतीचा मुद्देमाल हस्तगत केला आहे.

धारवाड जिल्ह्यातील अण्णिगेरी तालुक्यातील बसापूर गावात २ एप्रिल रोजी झालेल्या चोरीच्या घटनेप्रकरणी पोलिसांनी उमेश हरणश शिकारी आणि ईरप्पा हरणश शिकारी या दोघांना अटक केली आहे. २ एप्रिल रोजी बसापूरमधील एका घराचे कुलूप तोडून चोरी करण्यात आली होती, ज्याबाबत संबंधित घरमालकाने पोलीस ठाण्यात तक्रार दाखल केली होती. या तक्रारीनंतर वेगाने तपास करत पोलिसांनी आठवड्याभरात आरोपींच्या मुसक्या आवळल्या आहेत.

अटक करण्यात आलेल्या या आरोपींकडून ३५ ग्रॅम सोने, ७२० ग्रॅम चांदी आणि पूजेचे साहित्य असा एकूण पाच लाख रुपयांचा मुद्देमाल पोलिसांनी जप्त केला आहे.

पोलीस चौकशीदरम्यान आरोपींनी अण्णिगेरीमधील तहसीलदार कार्यालयाचे कुलूप तोडून चोरीचा प्रयत्न केल्याची कबुली दिली. यासोबतच हुडको कॉलनीतील रमेश कोटगी यांच्याकडे केलेली चोरी आणि २०२२ मध्ये शिशुविनाहाळ येथील मुख्तमसाब हंचिनाळ यांच्या घरात झालेली चोरी या गुन्ह्यांचीही त्यांनी कबुली दिली असल्याची माहिती पोलीस सूत्रांकडून मिळाली आहे. तपासाची प्रक्रिया पूर्ण झाल्यानंतर दोन्ही आरोपींना न्यायाधीशांसमोर हजर करून त्यांची कारागृहात रवानगी करण्यात आली आहे.