राज्यातील सात हजार आशा कार्यकर्त्यांना सेवेतून कमी करण्याच्या सरकारच्या निर्णयाविरोधात धारवाडमध्ये सुरू असलेले सात दिवसांचे आंदोलन पालकमंत्री संतोष लाड यांनी दिलेल्या आश्वासनानंतर अखेर मागे घेण्यात आले आहे.

धारवाड जिल्हाधिकारी कार्यालयासमोर गेल्या सात दिवसांपासून आशा कार्यकर्त्यांनी राज्य सरकार आणि आरोग्य विभागाच्या धोरणांविरोधात ठिय्या आंदोलन पुकारले होते. या आंदोलनस्थळी भेट देऊन संतोष लाड यांनी कार्यकर्त्यांशी संवाद साधला. सरकार किंवा आरोग्य विभागाचा कोणत्याही आशा कार्यकर्त्याला सेवेतून कमी करण्याचा विचार नाही, असे संतोष लाड यांनी स्पष्ट केले. कार्यकर्त्यांनी दिलेल्या निवेदनावर मुख्यमंत्री आणि आरोग्य मंत्र्यांशी सविस्तर चर्चा करून तोडगा काढण्याचे आश्वासन संतोष लाड यांनी दिले.

कार्यकर्त्यांनी आंदोलन मागे घेऊन पुन्हा आपल्या नियुक्त कामांवर रुजू व्हावे, अशी विनंती संतोष लाड यांनी केली. याचवेळी आशा कार्यकर्त्यांच्या समस्यांचे निवारण करण्याच्या सूचना संतोष लाड यांनी जिल्हाधिकारी स्नेहल आर. यांना दिल्या. मंत्र्यांच्या सकारात्मक प्रतिसादानंतर कार्यकर्त्यांनी समाधान व्यक्त करत आपले सात दिवसांचे आंदोलन मागे घेतले.