बागलकोट विधानसभा पोटनिवडणुकीचा आखाडा आता चांगलाच तापला असून, मंत्री सतीश जारकीहोळी यांचे सुपुत्र आणि युवक काँग्रेसचे प्रदेश सरचिटणीस राहुल जारकीहोळी यांनी आज काँग्रेस उमेदवार उमेश मेटी यांच्यासाठी जोरदार प्रचार केला.

बागलकोट मतदारसंघातील शिरूरसह विविध गावांमध्ये राहुल जारकीहोळी यांनी आज दौरा केला. काँग्रेस उमेदवार उमेश मेटी यांच्या विजयासाठी त्यांनी घरोघरी जाऊन मतदारांशी संवाद साधला. या पोटनिवडणुकीत काँग्रेसला जनतेचा आशीर्वाद मिळेल, असा विश्वास त्यांनी व्यक्त केला. “आमच्यासाठी ही एक मोठी संधी आहे. पोटनिवडणुकीत कशा प्रकारे काम करावे लागते, हे आम्ही शिकत आहोत,” असे राहुल जारकीहोळी यांनी नम्रपणे नमूद केले.

सतीश जारकीहोळी यांना ‘सीझनल राजकारणी’ म्हणणाऱ्या भाजप नेते श्रीरामुलू यांच्या टीकेचा राहुल जारकीहोळी यांनी समाचार घेतला. श्रीरामुलू हे आमच्या समाजाचे ज्येष्ठ नेते आहेत हे खरे, पण सतीश जारकीहोळी यांची समाजसेवा आणि योगदान जनतेला चांगले ठाऊक आहे. लोक हुशार आहेत, कोणाच्या पाठीशी उभे राहिल्याने समाजाचे भले होईल, याची जाणीव त्यांना आहे, असे राहुल जारकीहोळी यांनी म्हटले आहे.

निवडणूक रणनीतीबाबत बोलताना त्यांनी सांगितले की, प्रत्येक मतदारसंघासाठी सतीश जारकीहोळी यांची एक वेगळी रणनीती असते. ते अंतर्गत पातळीवर निवडणूक अतिशय सक्षमपणे हाताळतात. निवडणुकीच्या काळात अनुदान जाहीर करण्याच्या आरोपावर प्रतिक्रिया देताना त्यांनी स्पष्ट केले की, सर्व अनुदाने अधिकृतपणे जाहीर झाली आहेत. जनतेच्या जुन्या मागण्यांना सरकारने प्रतिसाद दिला आहे. हे केवळ बागलकोटपुरते मर्यादित नसून, संपूर्ण राज्यात जिथे समस्या आहेत, तिथे विभाग आणि सरकार पातळीवर काम सुरू असल्याचे राहुल जारकीहोळी यांनी सांगितले.