बागलकोट पोटनिवडणुकीच्या प्रचार रणधुमाळीत आज एक अत्यंत रंजक प्रसंग पाहायला मिळाला. भाजपचा प्रचार करताना माजी मंत्री श्रीरामुलू यांनी अनावधानाने थेट काँग्रेसच्या बड्या नेत्याच्या घरात प्रवेश केल्याने सर्वांच्याच भुवया उंचावल्या आहेत.

बागलकोटमधील जुन्या शहरातील किल्ला गल्ली भागात भाजप नेते श्रीरामुलू आज घरोघरी जाऊन मतदारांच्या भेटी घेत होते. याच दरम्यान ते चुकून केपीसीसीचे माजी सचिव आणि काँग्रेसचे ज्येष्ठ नेते बसवप्रभू सरनाडगौडा यांच्या निवासस्थानी पोहोचले. इतकेच नव्हे, तर काँग्रेस नेत्याच्या घराच्या आवारात उभे राहूनच त्यांनी माध्यमांशी संवाद साधल्याने कार्यकर्त्यांची मोठी तारांबळ उडाली.

या अनपेक्षित प्रकारामुळे भाजप कार्यकर्त्यांमध्ये काही काळ गोंधळाचे वातावरण निर्माण झाले होते. घरोघरी प्रचार करण्याच्या घाईत समोरचे घर काँग्रेस नेत्याचे आहे, हे लक्षात न आल्याने हा प्रकार घडल्याचे बोलले जात आहे. पोटनिवडणुकीच्या या रणसंग्रामात चक्क विरोधकांच्या घरातच श्रीरामुलू यांनी हजेरी लावल्याने सध्या बागलकोटमध्ये याचीच चर्चा रंगली आहे.