बागलकोटचे आमदार एच. वाय. मेटी यांच्या निधनामुळे रिक्त झालेल्या या जागेसाठी ९ एप्रिल रोजी मतदान होणार आहे. भाजपमध्ये उमेदवाराचे नाव निश्चित मानले जात असताना, काँग्रेसमध्ये मात्र मेटींच्या दोन पुत्रांमध्येच तिकीटासाठी मोठी स्पर्धा सुरू झाली आहे.

बागलकोट विधानसभा मतदारसंघाच्या पोटनिवडणुकीचे बिगुल वाजले असून राजकीय वातावरण तापू लागले आहे. बागलकोट जिल्ह्याच्या राजकारणात या पोटनिवडणुकीमुळे हालचालींना वेग आला आहे. आजपासूनच आचारसंहिता लागू झाली असून २३ मार्च ही उमेदवारी अर्ज भरण्याची शेवटची तारीख आहे. या मतदारसंघात एकूण २,५९,२६० मतदार असून त्यापैकी १,३२,४७६ महिला मतदारांची भूमिका निर्णायक ठरणार आहे. ३१९ मतदान केंद्रांवर मतदान होणार असून जिल्हा प्रशासन निवडणुकीसाठी सज्ज झाले आहे. विशेष म्हणजे शंभर वर्षांहून अधिक वय असलेले ४४ मतदार या भागात आहेत.

बागलकोट विधानसभा पोटनिवडणुकीसाठी भाजप कार्यकर्ते पूर्णपणे सज्ज असून मतदारसंघात पक्षाची संघटना अत्यंत मजबूत आहे, असा विश्वास माजी आमदार आणि भाजपचे इच्छुक उमेदवार डॉ. विरण्णा चरंतीमठ यांनी व्यक्त केला आहे. मतदारसंघात दररोज बूथ पातळीवर आणि महिला आघाडीच्या बैठका सुरू असून आज बंजारा समाजातील तरुणही पक्षप्रवेश करत आहेत.

उमेदवार निवडीबाबत वरिष्ठ नेते चर्चा करत असून येत्या आठवडाभरात सर्व काही अंतिम होईल. त्यानंतर वरिष्ठ जो उमेदवार ठरवतील, तो आपला उमेदवारी अर्ज दाखल करेल. ही पोटनिवडणूक म्हणजे २०२८ च्या निवडणुकीची दिशा ठरवणारी ठरेल. या निवडणुकीसाठी बी. एस. येडियुरप्पा चार दिवस प्रचार करणार आहेत.

येडियुरप्पा यांच्यासोबतच बी. वाय. विजयेंद्र, प्रल्हाद जोशी, शोभा करंदलाजे, व्ही. सोमण्णा आणि बसवनगौडा पाटील यत्नाळ यांच्यासह अनेक राज्यस्तरीय नेते प्रचारात सहभागी होणार आहेत. मतदारसंघात सध्या कोणतीही सहानुभूतीची लाट नसली तरी भाजपसाठी पोषक वातावरण आहे. संपूर्ण सरकार जरी येथे तळ ठोकून बसले, तरी भाजपचा विजय निश्चित आहे, असे चरंतीमठ यांनी सांगितले.

तिकीट वाटपावरून काँग्रेसमध्ये पेच निर्माण झाला आहे. दिवंगत एच. वाय. मेटी यांचे पुत्र मल्लिकार्जुन मेटी आणि उमेश मेटी या दोघांनीही तिकीटासाठी आग्रह धरला आहे. मुलांमधील ही स्पर्धा मुख्यमंत्री सिद्धरामय्या यांच्यासाठी मोठे आव्हान ठरली आहे. दुसरीकडे भाजपमधून माजी आमदार विरण्णा चरंतीमठ यांचे नाव जवळपास निश्चित झाले असून भाजपने प्रचाराची तयारी सुरू केली आहे. ४ मे रोजी जाहीर होणाऱ्या निकालात बागलकोटची जनता कोणाच्या पारड्यात आपले मत टाकते, हे स्पष्ट होईल.