कर्नाटक बाल विकास अकादमीचे अध्यक्ष संगमेश अप्पाजी बबलेश्वर आणि कर्नाटक शहर पाणी पुरवठा व सांडपाणी मंडळाच्या अध्यक्षा शिवलीला विनय कुलकर्णी या दोन्ही नेत्यांना राज्यमंत्री पदाचा दर्जा बहाल करण्यात आला असून, यासंदर्भातील अधिकृत आदेश सरकारने जारी केला आहे.

कर्नाटक बाल विकास अकादमीची धुरा सांभाळणारे संगमेश अप्पाजी बबलेश्वर आणि शहर पाणी पुरवठा मंडळाच्या अध्यक्षा शिवलीला विनय कुलकर्णी यांना पुढील आदेश येईपर्यंत राज्यमंत्री पदाचे सर्व अधिकार आणि सवलती लागू राहतील, असे सरकारने स्पष्ट केले आहे. या नियुक्तीची अंमलबजावणी त्वरित करण्याचे निर्देश प्रशासनाला देण्यात आले आहेत.

राज्य सरकारकडून अधिकृत आदेश प्रसिद्ध झाल्यानंतर धारवाड जिल्ह्याचे पालकमंत्री, स्थानिक आमदार आणि विविध लोकप्रतिनिधींनी या निवडीचे स्वागत केले आहे. नवीन जबाबदारी मिळाल्याबद्दल संगमेश बबलेश्वर आणि शिवलीला कुलकर्णी यांचे सर्व स्तरांतून अभिनंदन होत असल्याची प्रतिक्रिया जिल्हा प्रशासनातील सूत्रांनी व्यक्त केली.