बागलकोट जिल्ह्यातील मुधोळ तालुक्यात वेगवान लॉरीने दुचाकीला जोरदार धडक दिली. या भीषण अपघातात आपल्या दिरासोबत गावी जाणाऱ्या आईचा आणि केवळ दोन वर्षांच्या चिमुरडीचा जागीच मृत्यू झाला आहे.

बागलकोट जिल्ह्यातील मुधोळ तालुक्यातील सोरगावी गावाजवळ लॉरी आणि दुचाकीमध्ये झालेल्या या भीषण अपघातात आई आणि मुलीचा जागीच मृत्यू झाला. मजुंळा दळवाई (२८) आणि तिची दोन वर्षांची मुलगी वेधा अशी मृतांची नावे असून त्या मुधोळ तालुक्यातील मळली गावातील रहिवासी होत्या. मंजुळा या त्यांचा दीर हणमंत यांच्यासोबत दुचाकीवरून मळली गावाकडे जात असताना हा अपघात घडला. लॉरीने दिलेल्या भीषण धडकेमुळे या मायलेकींनी रस्त्यावरच अखेरचा श्वास घेतला.

या अपघातात दुचाकी चालक हणमंत हे गंभीर जखमी झाले असून, त्यांना तातडीने स्थानिक रुग्णालयात उपचारासाठी दाखल करण्यात आले आहे. घटनेची माहिती मिळताच मुधोळ पोलिसांनी घटनास्थळी भेट देऊन पाहणी केली असून मृतदेह शवविच्छेदनासाठी पाठवण्यात आले आहेत. वाहतूक नियमांचे उल्लंघन आणि अतिवेग या अपघाताला कारणीभूत असल्याचे प्राथमिक तपासात समोर आले असून, लॉरी चालकाविरुद्ध मुधोळ पोलीस ठाण्यात गुन्हा दाखल करण्यात आला आहे. मळली गावातील एका हसत्याखेळत्या कुटुंबातील आई आणि चिमुरडीचा मृत्यू झाल्याने संपूर्ण गावावर शोककळा पसरली आहे.