बागलकोट जिल्ह्यातील मुधोळ येथे ऊसाने भरलेल्या ट्रॅक्टरवरील ताबा सुटल्याने तो रस्त्याच्या कडेला असलेल्या एका दुकानात शिरला. या अपघातात कोणतीही जीवितहानी झाली नसली तरी परिसरात काही काळ भीतीचे वातावरण निर्माण झाले होते.

मुधोळ शहरातील तहसीलदार कार्यालयासमोर ऊसाने भरलेल्या ट्रॅक्टरचा भीषण अपघात झाला. वज्जरमट्टी गावातून ऊस घेऊन येत असताना रस्त्यावरील गतिरोधकावरून जाताना चालकाचे ट्रॅक्टरवरील नियंत्रण सुटले. यावेळी वेगात असलेला हा ट्रॅक्टर रस्त्याच्या कडेला असलेल्या एग राईसच्या दुकानात शिरला आणि समोर उभ्या असलेल्या एर्टिगा कारला पाठीमागून जोरात धडक दिली.

या धडकेमुळे दुकानातील सामानाचे मोठे नुकसान झाले असून एर्टिगा कारचा मागील भाग पूर्णपणे चक्काचूर झाला आहे. अपघाताच्या वेळी दुकानाजवळ कोणीही नसल्याने मोठा अनर्थ टळला आणि सर्वजण सुखरूप बचावले. या अपघातामुळे रस्त्यावर काही काळ वाहतूक कोंडी झाली होती. चालकाचा निष्काळजीपणा या अपघाताला कारणीभूत असल्याचे बोलले जात असून मुधोळ पोलिसांनी घटनास्थळी भेट देऊन पाहणी केली आहे.