बागलकोट जिल्ह्यातील अमीनगड शहरात ‘लुंगी गँग’ म्हणून ओळखल्या जाणाऱ्या तीन चोरट्यांनी घरफोडीचा प्रयत्न केला. मात्र, त्यांच्या चोरीचा हा संपूर्ण ‘कारनामा’ घरात बसवलेल्या सीसीटीव्ही कॅमेऱ्यात स्पष्टपणे कैद झाला असून, यामुळे चोरट्यांचा डाव फसला आहे.

रविवारी रात्री ११:४५ ते १:४५ च्या दरम्यान ही घटना घडली असून लुंगी परिधान करून, तोंडावर मास्क लावून आणि हातात रॉड घेऊन आलेल्या या चोरट्यांनी शहरातील रहिवासी असलेल्या दड्डेनवर यांच्या घरात घुसण्याचा प्रयत्न केला. इतकेच नव्हे, तर हे चोर पी एस हळ्ळूर यांच्या घराजवळही काही काळ घुटमळले. त्यानंतर एस.पी.आर. खाद्री यांचे कार्यालय आणि मंजू हूगार यांच्या टाईल्सच्या दुकानातही चोरीचा प्रयत्न केला. मात्र, चोरट्यांचे सर्व प्रयत्न निष्फळ ठरले आणि त्यांना कोणतीही वस्तू न मिळाल्याने ते रिकाम्या हाताने परतले.

चोरीचा प्रयत्न झाल्याचे संपूर्ण दृश्य सीसीटीव्ही कॅमेऱ्यात स्पष्टपणे चित्रित झाले आहे. सीसीटीव्ही फुटेजच्या आधारावर अमीनगड पोलीस ठाण्यात गुन्हा दाखल करण्यात आला असून, पोलीस चोरट्यांचा शोध घेत आहेत. शहरात या ‘लुंगी गँग’च्या वाढत्या उपद्रवामुळे रहिवासी भयभीत झाले आहेत.