आमदार एच. वाय. मेटी यांच्या निधनानंतर त्यांचे पार्थिव त्यांच्या मूळगावी तिम्मापूर येथील शेतात पंचमहाभूतात विलीन झाले. कुटुंबीय आणि हजारो चाहत्यांच्या उपस्थितीत मेटी यांच्यावर शासकीय इतमामात अंत्यसंस्कार करण्यात आले.

बागलकोटचे आमदार एच. वाय. मेटी (७९) यांच्यावर त्यांच्या तिम्मापूर गावातील शेतात अंत्यसंस्कार करण्यात आले. कुरुब समाजाच्या प्रथेनुसार हा अंत्यसंस्कार करण्यात आला असून, त्यांच्या आई-वडिलांच्या समाधीजवळच मेटी यांच्यावर सकल शासकीय इतमामात अंत्यसंस्कार करण्यात आले. पोलिसांनी तीन फैरी झाडून मानवंदना दिली. यावेळी मुख्यमंत्री सिद्धरामय्या यांनी राष्ट्रध्वज मेटी यांच्या पुत्रांकडे सुपूर्द केला. अंत्यसंस्काराला मंत्री एम. बी. पाटील, सतीश जारकीहोळी, भैरती सुरेश, एच. सी. महादेवप्पा आणि आमदार यतींद्र सिद्धरामय्या उपस्थित होते.

यावेळी बोलताना मुख्यमंत्री सिद्धरामय्या यांनी एच. वाय. मेटी यांच्यासोबतच्या जुन्या आठवणींना उजाळा दिला. १९८५ पासून एच. वाय. मेटी यांच्यासोबत आपले जुने संबंध होते. मेटी हे माझ्या सर्व निर्णयांप्रती प्रामाणिक राहिले. त्यांनी अहिंद संघटनेतही खांद्याला खांदा लावून काम केले. त्यांची निष्ठा आणि बांधीलकी अतुलनीय होती. एच. वाय. मेटी यांचे दुसरे नाव म्हणजे निष्ठावंत राजकारणी असेच होते. वयाने लहान असूनही ते आम्हाला ज्येष्ठांप्रमाणे मान देत असत. लोकांनी दिलेल्या अधिकाराचे ऋण कामातून फेडले पाहिजे. कुरुब समाजात जन्मलेले असले तरी मेटी हे धर्मनिरपेक्ष व्यक्तिमत्त्व होते, असे मुख्यमंत्री म्हणाले.

तत्पूर्वी सकाळी, आमदार एच. वाय. मेटी यांच्या पार्थिवाचे श्री बसवाजय मृत्युंजय स्वामीजी यांनी अंत्यदर्शन घेतले. यावेळी स्वामीजी म्हणाले, “मेटी हे श्री पीठाचे अभिमानी होते आणि त्यांचा मठाशी जवळचा संबंध होता. त्यांच्या निधनाने खूप निराशा झाली आहे. मेटी यांचे व्यक्तिमत्त्व साधे आणि जनहितैषी होते. प्रत्येक निवडणुकीच्या वेळी ते मठात येऊन आशीर्वाद घेत असत. त्यांच्या कुटुंबियांना आणि चाहत्यांना हे दु:ख सहन करण्याची शक्ती मिळो,” अशी प्रार्थना स्वामीजींनी केली.

यावेळी आमदार एच. वाय. मेटी यांचे कुटुंबीय, चाहते, या भागातील नागरिक आणि अन्य मान्यवर उपस्थित होते.