यूट्यूबर ख्वाजा उर्फ मुकळेप्पा याच्याशी झालेल्या आपल्या मुलीच्या लग्नाला विरोध दर्शवत, यूट्यूबर गायत्री हिची आई शिवक्का यांनी गंभीर आरोप केले आहेत. मुकळेप्पाने आपली मुलगी फसवून पळवून नेल्याचा आणि धमक्या दिल्यामुळे इतके दिवस आपण गप्प बसल्याचे त्यांनी नमूद केले.

हुबळी येथे आयोजित पत्रकार परिषदेत बोलताना शिवक्का यांनी, “माझ्या मुलीच्या या लग्नाला माझा पाठिंबा नव्हता. यूट्यूबर ख्वाजा उर्फ मुकळेप्पाने फसवणूक करून माझ्या मुलीला पळवून नेले आहे,” असा थेट आरोप केला. “ख्वाजाने आम्हाला धमक्या दिल्या होत्या, त्यामुळे आम्ही इतके दिवस शांत होतो. आता हिंदू समर्थक संघटना आमच्या पाठिशी उभ्या राहिल्या आहेत. आम्हाला आमची मुलगी परत हवी आहे,” असे म्हणत त्यांनी अश्रू ढाळले.

श्रीरामसेना नेते बसवराज गौडर यांनी या प्रकरणी बोलताना सांगितले की, ख्वाजा शिरहट्टी आणि गायत्री यांचा विवाह कायदेशीररित्या अवैध आहे. “आम्ही या प्रकरणात न्यायालयाचा दरवाजा ठोठावणार आहोत. सब-रजिस्ट्रार, कर्मचारी आणि साक्षीदारांविरुद्ध कायदेशीर कारवाई झाली पाहिजे. तसेच, या विवाहाचे प्रमाणपत्र तत्काळ रद्द करण्यात यावे” अशी मागणी त्यांनी केली.

या पत्रकार परिषदेला मंजुनाथ काटकर आणि वीरय्या सालीमठ आदी उपस्थित होते.