पिसाळलेल्या माकडाच्या हल्ल्यामुळे बागलकोट जिल्ह्यातील रबकवी-बनहट्टी तालुक्यातील आसंगि गावातील लोक भयभीत झाले आहेत. माकडाच्या या दहशतीमुळे ग्रामस्थांच्या दैनंदिन कामात मोठा अडथळा येत आहे.

या माकडाने आतापर्यंत चार-पाच जणांना चावा घेऊन गंभीर जखमी केले असून, त्यांच्या हातावर आणि शरीरावर जीवघेणे हल्ले केले आहेत. माकडाच्या हल्ल्यापासून लहान मुलांचे संरक्षण करण्यासाठी ग्रामपंचायतीचे कर्मचारी लाऊडस्पीकरद्वारे त्यांना घराबाहेर न पडण्याचे आवाहन करत आहेत.

पिसाळलेल्या माकडाला पकडण्यासाठी ग्रामपंचायतीच्या कर्मचाऱ्यांना सहकार्य करण्याचे आवाहन ग्रामस्थांना करण्यात आले आहे. माकडाला पकडण्यासाठी ग्रामपंचायतीचे कर्मचारी सध्या मोहीम राबवत असून, ग्रामस्थही काठ्या घेऊन त्यांना मदत करत आहेत. जखमींवर रबकवी-बनहट्टीच्या तालुका रुग्णालयात उपचार सुरू आहेत.