बागलकोट जिल्ह्यातील बीळगी तालुक्यातील सिनग क्रॉसजवळ, हिंदू संघटनांच्या कार्यकर्त्यांनी गोमांस घेऊन जाणारे वाहन पकडले आणि त्याला पोलिसांच्या ताब्यात दिले. या कारवाईमुळे गोमांस तस्करीचा एक मोठा प्रकार उघडकीस आला आहे.

विजापूरहून हुबळीकडे निघालेल्या या वाहनात सुमारे दोन टनांपेक्षा जास्त गोमांस आणि हाडे असल्याचे समोर आले. कार्यकर्त्यांनी वाहन अडवून तपासणी केली असता हा अवैध साठा उघडकीस आला. त्यांनी तात्काळ पोलिसांना माहिती दिली. पोलिसांनी घटनास्थळी येऊन वाहन आणि चालकाला ताब्यात घेतले. या घटनेमुळे काही काळ परिसरात तणावाचे वातावरण निर्माण झाले होते.

पोलिसांनी वाहन चालक हसनसाब जंबगी याला अटक केली असून त्याचे वाहन ताब्यात घेतले आहे. अवैधपणे गोमांस वाहतूक केल्यामुळे त्याच्यावर कायदेशीर कारवाई करण्यात येणार असल्याचे पोलिसांनी सांगितले. बीळगी पोलीस ठाण्यात याप्रकरणी गुन्हा दाखल करण्यात आला असून, पुढील तपास सुरू आहे.