कोकण किनारपट्टी भागात गेल्या आठवड्यात झालेल्या मुसळधार पावसामुळे कोयना धरणातून मोठ्या प्रमाणात पाणी सोडण्यात आले. याचा परिणाम म्हणून कृष्णा नदीला महापूर आला असून, नदीच्या बॅकवॉटरमुळे अनेक गावांना जोडणारे रस्ते पाण्याखाली गेले आहेत, ज्यामुळे वाहतूक पूर्णपणे ठप्प झाली आहे.

उगार आणि कुडची येथील कृष्णा नदीवरील पुलावरून ११ फूट पाणी वाहत असल्याने गेल्या चार दिवसांपासून कागवाड-जमखंडी मार्गावरील वाहतूक थांबली आहे. कृष्णा नदीच्या बॅकवॉटरमुळे उगार-ऐनापूर, उगार बुद्रुक-कुसनाळ, उगार बुद्रुक-शिरगुप्पी, कृष्णा कित्तूर-ऐनापूर, कात्राळ, मंगवती-जुगुळ या गावांना जोडणारे छोटे पूल पाण्याखाली गेले आहेत. यामुळे या भागातील वाहतूक पूर्णपणे ठप्प झाली आहे.

काही शेतकरी आपल्या जनावरांसाठी चारा आणि इतर कामांसाठी ट्रॅक्टरचा वापर करत आहेत. हे सर्व पूल नदीच्या पाण्यात बुडू नयेत यासाठी त्यांची उंची वाढवण्याची मागणी येथील ग्रामस्थांनी केली आहे.

जुगुळ-खिद्रापूर, मुळवाड-चिंचली आणि कुडची-उगार येथील कृष्णा नदीवर पूल बांधण्यात आले आहेत, परंतु त्यांचे बांधकाम अद्याप अपूर्ण आहे. विशेष म्हणजे, या पुलांचे काम दोन वर्षांपूर्वीच पूर्ण होणे अपेक्षित होते. मात्र, कंत्राटदार आणि अधिकाऱ्यांच्या निष्काळजीपणामुळे हे काम पूर्ण झालेले नाही. जर पुलांचे काम पूर्ण झाले असते, तर वाहतुकीला कोणताही अडथळा आला नसता. उगार-ऐनापूर, उगार-उगार बुद्रुक मार्गावर पूल बांधले आहेत, परंतु पुलाखाली पाणी साचल्यामुळे वाहतूक ठप्प झाली आहे. पूल बांधण्यापूर्वी अधिकाऱ्यांनी अनेक वर्षांच्या पाण्याची पातळी लक्षात घेऊन सर्वेक्षण करायला हवे होते. मात्र, आता पूल बांधूनही वाहतूक थांबली आहे, अशी नाराजी ग्रामस्थांनी व्यक्त केली आहे.

कागवाडचे आमदार राजू कागे यांनी अधिकाऱ्यांची बैठक बोलावून हे अपूर्ण काम पूर्ण करण्यासाठी प्रयत्न करावेत, अशी मागणी येथील लोकांनी केली आहे.