बेळगाव जिल्ह्यातील सवदत्ती शहरात एका व्यक्तीचा मृतदेह रक्ताच्या थारोळ्यात आढळल्याने खळबळ उडाली आहे. सवदत्ती येथील एपीएमसीमध्ये ही घटना घडली असून, व्यक्तीची निर्घृण हत्या केल्याची शक्यता व्यक्त केली जात आहे.

सवदत्ती शहरातील एपीएमसीमध्ये एका अज्ञात व्यक्तीचा मृतदेह रक्ताच्या थारोळ्यात पडलेला आढळून आला. मृतदेहाशेजारी विटा आणि दगडही सापडले आहेत, ज्यामुळे हत्येचा संशय अधिक बळावला आहे.

घटनेची माहिती मिळताच सवदत्तीचे सीपीआय (पोलीस निरीक्षक) धर्मकर धर्मट्टी आणि पीएसआय के. एम. बन्नूर यांनी तात्काळ घटनास्थळी भेट दिली. त्यांनी परिसराची पाहणी केली असून, या प्रकरणाचा तपास सुरू केला आहे. ही हत्या कोणी केली आणि त्यामागचे कारण काय होते, याचा शोध पोलीस घेत आहेत.