धारवाड जिल्ह्यात मंगळवारपासून पावसाने जोरदार हजेरी लावली असून, बुधवारीही वरुणराजाचा धुमाकूळ सुरूच आहे. चक्रीवादळाच्या प्रभावामुळे धारवाडसह अनेक ठिकाणी ढगांच्या गडगडाटासह जोरदार पाऊस पडत आहे.

या जोरदार पावसामुळे धारवाडमधील तुप्परी ओढा भरून वाहत आहे. नवलगुंद तालुक्यातील तुप्परी ओढा पूर्णपणे भरून वाहत असल्यामुळे तेथील पूल पाण्याखाली गेला आहे. याशिवाय, कब्बेनूर गावाजवळचा कळ्ळी ओढाही दुथडी भरून वाहत असून, सध्या बांधकाम सुरू असलेला छोटा पूल पाण्यात बुडाला आहे. पाण्याच्या प्रचंड प्रवाहामुळे एक पाण्याच्या टँकरही त्याच ठिकाणी उलटला आहे.

बुधवारी सकाळीही धारवाडमध्ये पावसाने जोर धरला होता. दुपारी १२ वाजण्याच्या सुमारास सुरू झालेला पाऊस एक तासापेक्षा जास्त वेळ कोसळला. धारवाड मध्ये होत असलेल्या पावसामुळे जनजीवन विस्कळीत झाले आहे.