चिकोडी आरोग्य विभाग आणि गोडाबाई करनिंग फाउंडेशन यांच्या संयुक्त विद्यमाने संकेश्वर येथे आरोग्य विभागाच्या कर्मचाऱ्यांसाठी जिल्हास्तरीय बॅडमिंटन स्पर्धेचे आयोजन करण्यात आले होते.

हुक्केरी तालुका आरोग्य अधिकारी डॉ. महांतेश नरसन्नवर यांच्या हस्ते स्पर्धेचे उद्घाटन झाले. यावेळी बोलताना गोडाबाई करनिंग फाउंडेशनचे अध्यक्ष निखिल गंगरेड्डी म्हणाले की, सरकारी अधिकारी आणि कर्मचाऱ्यांना दैनंदिन कामाचा मोठा ताण असतो. त्यातून बाहेर पडून शारीरिक आणि मानसिक आरोग्य सुदृढ ठेवण्यासाठी खेळ आवश्यक आहेत. यासाठी फाउंडेशनच्या वतीने दरवर्षी बॅडमिंटन स्पर्धांचे आयोजन करून कर्मचाऱ्यांना प्रोत्साहन दिले जाते.

या स्पर्धेत हुक्केरी, संकेश्वर, गोकाक, रायबाग आणि चिकोडी यांसह विविध भागांतील आरोग्य विभागाचे अधिकारी आणि कर्मचारी सहभागी झाले होते.

यक्संबा सरकारी रुग्णालयाचे मुख्य वैद्याधिकारी डॉ. शांताराम बागेवाडी यांनी खेळाडूंना टी-शर्टचे वितरण केले. सार्वजनिक सेवेत सातत्याने कार्यरत असलेल्या कर्मचाऱ्यांसाठी चिकोडी जिल्हा आरोग्य विभागाकडून अशा क्रीडा स्पर्धांचे आयोजन करून त्यांना प्रोत्साहन दिले जात असल्याचे त्यांनी सांगितले.

आरोग्य विभागाच्या जिल्हा कार्यालयाचे अधीक्षक नवीन गंगरेड्डी यांनी प्रास्ताविक केले. बी. ए. कुंभार यांनीही सरकारी कर्मचाऱ्यांनी दररोजच्या कामातून वेळ काढून खेळांमध्ये सहभागी व्हावे, त्यामुळे मानसिक स्वास्थ्य चांगले राहण्यास मदत होते, असे मत व्यक्त केले.

हुक्केरी तालुका आरोग्य अधिकारी डॉ. महांतेश नरसन्नवर यांच्या हस्ते विजेत्या खेळाडूंना चषक प्रदान करण्यात आले.

यावेळी अॅड. काडाप्पा कुरबेट, डॉ. दत्तात्रय दोडमनी, डॉ. शांताराम बागेवाडी, उत्तमसिंग राजपूत, दीपक चिनारी, डॉ. प्रशांत कोतगीमठ, कुमार चौगला, विनायक हालभावी, महावीर चौगला, संतोष पाटील, मयूर शिंदे, संतोष बेळवी आदी उपस्थित होते.