महाराष्ट्रातील पश्चिम घाट क्षेत्रात गेल्या काही दिवसांपासून सुरू असलेल्या मुसळधार पावसामुळे बेळगाव शहराचा मुख्य पाण्याचा स्त्रोत असलेले राक्कसकोप्प जलाशय पूर्ण भरले आहे. या पार्श्वभूमीवर शुक्रवारी बेळगाव महापालिकेच्या महापौर प्रीती कामकर यांच्या हस्ते जलाशयावर पारंपरिक पद्धतीने गंगापूजन करण्यात आले.

पश्चिम घाट क्षेत्रात सतत पाऊस पडत असल्याने राक्कसकोप्प जलाशयातील पाण्याची आवक मोठ्या प्रमाणावर वाढली आहे. परिणामी जलाशयातील पाणीपातळी वाढून ते आता पूर्ण भरले आहे. जलाशय भरल्यामुळे बेळगाव शहरातील नागरिकांमध्ये आनंदाचे वातावरण पसरले आहे.

शहराच्या पिण्याच्या पाण्याचा मुख्य स्त्रोत असलेले हे जलाशय भरल्यामुळे आगामी काळात बेळगाव शहराला पिण्याच्या पाण्याचा पुरवठा सुरळीत होण्यास मदत होणार आहे. पावसाळ्यात जलाशयात चांगल्या प्रमाणात पाणी जमा झाल्यामुळे उन्हाळ्यातही पाण्याची टंचाई भासणार नाही, असा विश्वास महापौरांनी व्यक्त केला.

उपमहापौर हनुमंत कोंगाली म्हणाले की, जलाशयाच्या पाणलोट क्षेत्रात पाऊस सुरूच असल्याने अधिकारी पाण्याच्या पातळीवर आणि आवकीवर सतत लक्ष ठेवून आहेत. खबरदारीचा उपाय म्हणून जलाशयाच्या आजूबाजूच्या परिसरावरही विशेष लक्ष दिले जात आहे. बेळगावकरांच्या पिण्याच्या पाण्याची गरज पूर्ण करण्यात राक्कसकोप्प जलाशय महत्त्वाची भूमिका बजावत असून, ते पूर्ण भरल्याने नागरिकांना मोठा दिलासा मिळाला आहे.

या वेळी पालिका आयुक्त कार्तिक, पालिका सदस्य गिरीश धोंगडी, मंगेश पवार यांच्यासह इतर मान्यवर उपस्थित होते.