८० व्या स्वातंत्र्यदिनानिमित्त विजापूर शहरात भाजपच्या नेतृत्वात भव्य तिरंगा यात्रा काढण्यात आली. यावेळी ३०० मीटर लांबीच्या प्रचंड राष्ट्रध्वजासह शेकडो नागरिक या मिरवणुकीत सहभागी झाले होते.

विजापूर शहरातील श्री सिद्धेश्वर मंदिरापासून सुरू झालेली ही तिरंगा यात्रा गांधी चौक, बसवेश्वर चौक, कनकदास चौक मार्गे आंबेडकर चौकापर्यंत निघाली.

शाळा-महाविद्यालयांचे विद्यार्थी, भाजप नेते आणि कार्यकर्त्यांनी हातात राष्ट्रध्वज घेऊन यात्रेत सहभाग नोंदवला. मिरवणुकीदरम्यान देण्यात आलेल्या देशभक्तीपर घोषणांनी परिसर दुमदुमून गेला होता.

३०० मीटर लांबीचा हा भव्य राष्ट्रध्वज या यात्रेचे मुख्य आकर्षण ठरला. शहरातील प्रमुख रस्त्यांवर सर्वत्र तिरंगा पाहायला मिळत होता. स्वातंत्र्यसैनिकांच्या त्यागाचे आणि बलिदानाचे स्मरण करत देशाची एकता आणि अखंडतेचा संदेश देण्यासाठी या यात्रेचे आयोजन करण्यात आले होते.