बेळगाव जिल्ह्यातील कित्तूर तालुक्यातील एम. के. हुबळी शहरात सीसी कॅमेऱ्यांद्वारे सातत्याने आकारण्यात येणाऱ्या दंडाविरोधात नागरिक आणि विविध संघटनांनी मोठे आंदोलन केले.

कित्तूर तालुक्यातील एम. के. हुबळी येथील बैलहोंगल मार्गावर लावण्यात आलेल्या सीसी कॅमेऱ्यांमुळे नागरिकांच्या मोबाईलवर सातत्याने दंडाचे संदेश येत असल्याने स्थानिकांमध्ये नाराजी आहे. शेतावर जाणाऱ्या शेतकऱ्यांनाही हेल्मेट न घातल्याच्या कारणावरून वारंवार ५०० रुपयांचा दंड आकारला जात असल्याचा आरोप करत नागरिकांनी संताप व्यक्त केला. शेतकरी, शाळकरी मुलांचे पालक आणि सर्वसामान्य नागरिकांना होणारा त्रास थांबवावा, अशी मागणी करत बैलहोंगल डीवायएसपींना निवेदन देण्यात आले.

कर्नाटक राज्य दलित संघर्ष समितीच्या समन्वयक संघटनेसह विविध संघटनांच्या नेतृत्वाखाली झालेल्या आंदोलनात स्थानिक शेतकरी, पालक आणि नागरिक सहभागी झाले होते. स्थानिकांच्या सोयीसाठी नियमांमध्ये सवलत द्यावी तसेच अनावश्यक दंड आकारणी तातडीने थांबवावी, अशी मागणी आंदोलकांनी केली.

यावेळी जिल्हा प्रधान सचिव राजशेखर हिंडलगी यांनी सीसी कॅमेऱ्यांच्या नावाखाली नागरिकांची होत असलेली पिळवणूक थांबवावी, अशी मागणी केली. नागरिकांना त्रास देण्यासाठी नव्हे तर सुरक्षेसाठी सीसी कॅमेऱ्यांचा वापर व्हावा, असे त्यांनी सांगितले.

आंदोलकांनी पोलिस अधिकाऱ्यांच्या माध्यमातून बैलहोंगल डीवायएसपींना निवेदन सादर केले. एका आठवड्यात या समस्येवर तोडगा न काढल्यास बेळगाव एसपी कार्यालयासमोर मोठे आंदोलन करण्याचा इशारा देण्यात आला.

यावेळी स्थानिक पोलिस अधिकारी आणि एएसआय बसप्पा उप्पारट्टी यांनी निवेदन स्वीकारले. आंदोलनात अदृश्य हिंडलगी, शेतकरी नेते रुद्रप्पा कोडली, भीमप्पा गुडेन्नवर, मुश्ताक साहेबखान, रंगनाथ चलवादी यांच्यासह संघटनेचे पदाधिकारी आणि नागरिक मोठ्या संख्येने उपस्थित होते.