गुरु आपल्याला चांगले वर्तन, विनयशीलता आणि नैतिक मूल्यांची शिकवण देऊन उत्तम माणूस घडवतो. मनातील अज्ञानाचा अंधकार दूर करून ज्ञानाचा प्रकाश देणाऱ्या गुरूला समाजात सर्वोच्च स्थान आहे, असे नागनूर रुद्राक्षी मठाचे डॉ. अल्लमप्रभु महास्वामीजी यांनी म्हटले.

बेळगाव येथील शिवबसवनगरमधील कुमारेश्वर मोफत विद्यार्थी प्रसाद निलयात आयोजित गुरुपौर्णिमा कार्यक्रमात ते बोलत होते. सिद्धरामेश्वर शिक्षण संस्थेचे सचिव एस. पी. हिरेमठ यांनी कार्यक्रमाचे अध्यक्षस्थान भूषवले. नागनूर रुद्राक्षी मठाच्या प्रसाद निलयाचे विद्यार्थी कार्तिक गौडर आणि श्रेया वारी यांनी सूत्रसंचालन केले. मंजुनाथ गाणिगेर यांनी स्वागत केले, श्रावणी नायक यांनी प्रास्ताविक मांडले आणि साक्षी सुळषि यांनी उपस्थितांचे आभार मानले.

या सोहळ्यास कनिष्ठ महाविद्यालयाचे प्राचार्य पी. डी. शिवनायकर, उपप्राचार्य शिवलीला पुजार यांच्यासह प्रसाद निलयाचे व्यवस्थापक, गृहपाल, शिक्षक आणि विद्यार्थी उपस्थित होते.