धारवाड निर्मिती केंद्राचे प्रकल्प व्यवस्थापक शिवकुमार पाटील यांची बेकायदेशीर नियुक्ती रद्द करून त्यांना तात्काळ बडतर्फ करावे आणि त्यांच्या भ्रष्टाचाराची ‘सीआयडी’ चौकशी व्हावी, अशी मागणी समता सेनेचे प्रदेशाध्यक्ष गुरुनाथ उळ्ळीकाशी यांनी केली.

पत्रकार परिषदेत बोलताना त्यांनी आरोप केला की, निर्मिती केंद्रात गेल्या काही वर्षांपासून मोठा गैरव्यवहार सुरू आहे. शिवकुमार यांनी स्वतःचे नेटवर्क तयार करून थेट भ्रष्टाचार केला आहे. त्यामुळे नियमानुसार पात्र उमेदवाराची निवड केली जावी.

या काळात झालेला गैरव्यवहार, जीएसटी आणि लेबर सेसची चोरी या सर्वांची सीआयडी चौकशी झाली पाहिजे. यासंदर्भात मुख्यमंत्री, पालकमंत्री व गृहमंत्र्यांचे लक्ष वेधले जाईल.

धारवाड जिल्हाधिकाऱ्यांना तक्रार देऊन १५ दिवसांची मुदत दिली जाईल; त्यानंतर कारवाई न झाल्यास तीव्र आंदोलन छेडू, असा इशारा त्यांनी दिला.

या पत्रकार परिषदेला अशोक काशेण्णावर, हनुमंत तळवार, मंजुळा बेणगी, मंजुनाथ सण्णक्की आणि इम्तियाज विजापूर उपस्थित होते.