धारवाड येथील डॉक्टर हत्या प्रकरणातील मुख्य आरोपी महिलेवर हुबळीच्या ‘किम्स’ रुग्णालयात उपचार सुरू आहेत. आरोपी महिला शारीरिक आणि मानसिकदृष्ट्या पूर्णपणे बरी झाल्यानंतरच या प्रकरणाची सखोल चौकशी केली जाईल, अशी माहिती हुबळी-धारवाडचे पोलीस आयुक्त एन. शशिकुमार यांनी दिली आहे.

पोलीस आयुक्तांनी हुबळी येथील ‘किम्स’ रुग्णालयाला भेट देऊन आरोपी प्रियांका हिच्या प्रकृतीची विचारपूस केली. तिची ग्लुकोज पातळी खालावल्यामुळे तिला रुग्णालयात दाखल करण्यात आले होते. सध्या तिच्या प्रकृतीत सुधारणा होत असून, ती पूर्णपणे बरी झाल्यानंतर तिला ताब्यात घेऊन पुढील तपास केला जाईल, असे आयुक्तांनी सांगितले. तसेच, या घटनेदरम्यान तिच्या मुलावरही हल्ला झाला होता, मात्र आता त्या मुलाची प्रकृती सुधारली असून तो धोक्याबाहेर आहे, असेही त्यांनी स्पष्ट केले.