बेळगाव शहरातील शेट्टी गल्ली येथील सेंट जर्मन्स इंडियन हायस्कूलच्या वतीने वर्ष २०२६-२७ च्या शैक्षणिक वर्षासाठीच्या विद्यार्थी संसदेचा शपथविधी सोहळा चावट गल्ली येथील मारुती मंगल कार्यालयात उत्साहात पार पडला. शिस्त, देशभक्ती आणि नेतृत्वाची मूल्ये रुजवणारा हा सोहळा अत्यंत देखणा झाला.

दीपप्रज्वलन आणि प्रार्थनेने कार्यक्रमाची सुरुवात झाली. त्यानंतर नवनियुक्त विद्यार्थी प्रतिनिधींनी शिस्तबद्ध संचलन करत सभागृहात प्रवेश केला आणि आपल्या जबाबदाऱ्या स्वीकारल्या. डी.एल.ई. ट्रस्टचे अध्यक्ष उदयकुमार इडगल यांनी या कार्यक्रमाचे अध्यक्षस्थान भूषवले. भारतीय लष्कराच्या जे.एल. विंगचे एस्टॅब्लिशमेंट अधिकारी लेफ्टनंट कर्नल भरतेश हुलमनी मुख्य अतिथी म्हणून, तर बेळगाव वनपरिक्षेत्राचे उपवनपाल (DRFO) जाफरसादिक मुजावर हे सन्माननीय अतिथी म्हणून उपस्थित होते.

लष्करातील आपले अनुभव सांगताना लेफ्टनंट कर्नल भरतेश हुलमनी यांनी विद्यार्थ्यांना देशभक्ती, शिस्त आणि परिश्रमाचे महत्त्व पटवून दिले. तरुणांनी आयुष्यात मोठी ध्येये ठेवून देशासाठी योगदान द्यावे आणि भारतीय सशस्त्र दलात सामील होऊन देशसेवा करावी, अशी प्रेरणा त्यांनी दिली.

उपवनपाल जाफरसादिक मुजावर यांनी पर्यावरण संरक्षणाचा संदेश दिला. भावी पिढीसाठी हिरवेगार आणि निरोगी पर्यावरण राखणे ही प्रत्येकाची जबाबदारी असून विद्यार्थ्यांनी वृक्षारोपण व पर्यावरणपूरक जीवनशैलीचा अंगीकार करावा, असे त्यांनी सांगितले.

अध्यक्षीय भाषणात उदयकुमार इडगल यांनी नवनियुक्त विद्यार्थी नेत्यांचे अभिनंदन केले. शालेय प्रशासन, मुख्याध्यापिका, शिक्षक आणि पालकांचे कौतुक करत त्यांनी विद्यार्थी नेत्यांना प्रामाणिकपणे व शिस्तीने आपली कर्तव्ये बजावण्याचे आवाहन केले. कार्यक्रमात मुख्याध्यापिका झुबेरा पटेल, शिक्षक आणि कर्मचाऱ्यांच्या योगदानाचा गौरव करण्यात आला.